Kechiba Yihuda Iskariot shimtet ?

Tanü ama asenok menen alangzüktsü asoshi Yisu asüba anogo bilemteta amongdang, Yisu den anogo shia jajaba nütsüng Yihuda Iskariot indang mejembiang mesüidaktsür. Yisu nütsüng terana rongnung senyurji pa liasü. Ajisüaka, tesüngmangtsü aser tanü tashi nisungi angatettsü makokbaji Yihuda Iskariot ya Yisu nütsüng süaka paji Yisu Khristaji pei kibur aser kümtetdak ta agizüka amangba tamanger ka masü asü. Pa Yisu sülen anidakyonga pa tanüla jenjangbo kenyongi mekümzüki dang liasü. Aji oda, kechiba Pa dak mamanger ka Yisui pa nütsüng asütsü shim aser pa nemang telok meyong senotsü ketdangsütsü mapa lemzüktsü (?) ta aiben asenoki bilemer. Yohan tapu 13 tekong 10 nung pai nütsüngtem den jembidang, ‘nenok ajakbo tanüla taküm merükteta mali,’ ta ashiba angutsü. Tetezü, nütsüngtem rongnung Yihuda Iskariot-bo tanüla taküm memerükteti liasü. Aji oda, Yohan tapu 12: 6 nungbo Yihuda Iskariot ya auer liasü ta indangindanga shia angur. Ibaji angatettsü tasak. Yihuda Iskariot-i par tesayur Yisu Khrista nem tangari sen aika alangba senti totsü mezütsübajia teindok amai bilem, anungji pai iba totzü jagi sen kümer sensaker nem lemtsüang tajungba asütsü ta ashi. Ajisüaka, Yisui dang masü saka pa medemertem rongnunga pa jaklaji meteta liasü, anungji parnokia pai yamaji ashibaji shitakba sensaker meimba agi masü saka pai iba senji amshinüba agi auer mulungsentsü dener jembir ta ashiba iba lai tekong nungji jangjajangjaa shia angur. Tanü asenok jakla aser mulungjang den Yihuda Iskariot-i par kibur aser medemertem dang nungi senotsü miimzüka agitsü bilemba shisatsüji medemdangra asenoka kecha balaka masü ta jangjajangjaa asenok taküm tanüdangtsü nung angutsü. Iba ama memeshi memerükba nisung, auer ka kechiba Yisui shim (?) aser paia kechiba Yisu sülen anidak ta bilemdangdang, atangji telangzüba mangur. Ajisüaka, ashiko Yihuda nungertemi bilemba ama Yisu Khrista alimai arubaji Rom yimli makdoker Israel nunger nem alima nüchiso yimli ka agütsütsü asoshi aru tabo Yihuda Iskariot-i amanga alitsüa akok. Aji oda, aiben Yisu nütsüngtem rongnunga kodang Israel nungertemi yimsü asütsüsa yimli ka arudir, iba yimli nungji shiba tuluba asütsü ta tuluba aser temaba asütsü rakteper amai jembitepa liasü. Idangji, temetet Yihuda Iskariot-ia shilem agir alitsü aser pa mulungjang nunga kodang Israel yimliji arudir, pa nema tongtibang menden ka lemzüktsütsü ta imlaa alitsüa akok. Aji oda, Yisuji Tsüngrem chir ta amangba agi masü saka paji alima chuba ka ama bilema Pa yimsüsüba kübok senotsüa ajangzüktsüsa yimsüsüba menden tajung kabo angutsü ta bilemba teimla nung Yihuda Iskariot-i Yisu sülen anidaker südi. Ajisüaka, kodang Yihuda nungertemi Yisu tepsettsü renemba metet aser Yisui iba lima yimli asoshi masü saka tarutsü kotak yimli asoshi dang jembi, iba jagi Yihuda Iskariot teimla sama aser Pai pa kibuba ashioktsütsü mulungtet asütsü. Tanü ama Good Friday amongdang Pa nütsüng Yihuda Iskariot-iang Yisu ashioktsübaji kechiba (?) ta asenok mulungjang nung tasüngdangba aiter. Kenü anogo, British nunger pastor, Joseph Parker dang nisung kati, “kechiba Yisui Yihuda Iskariot ya Pa nütsüng asütsü shimtet ?” ta asüngdang. Idangji pai kanga junga bilemdang saka iba tasüngdangbaji pai melangzütet. Ajisüaka, idangji pa mulung animesüngzüktettsüsa tasüngdangba ka pa mulungjangi arubajibo, ‘kechiba Yisui ni shimtet ?’ ta asüba tasüngdangba liasü. Iba tasüngdangba jagi pastor Joseph Parker mulung animesüngzüktet. Asenok tesempatsü aketba temenen nisung. Asenoki meinyakdangba mapa tamajung aikabo malitsü. Ajisüaka, Yisu asüba taochi ajanga asenok kümzük aser Pai asenok pa nütsüng aser Par medemer asütsü shimtet. Pastor Parker-i pasasa asüngdangba amaji, Kechiba Pai ni shimtet ? Ibaji asenoki mangatettsüa akok ! Ajisüaka, asenoki metet Pa taochiji asenok menen dang nungi taoba, tesüngmangtsü temeim, iba temeim jagi asenok kümzük . Rom 5:8 nung ashir, asenok temenen nung alidang, Yisu asenok asoshi asü aser iba temeim jagi asenok kümzük.