Kedarnath film nokdangtsü benokba Bombay HC-i magizük

Luchii/December 6, 2018 (Agencies): Kedarnath film ajanga nüburtem tamangba yimsütsütsü temulung yirutsüba den tsüngrem ka jenjang ajemdaktsür, ta aija ken o benokba Bombay High Court-i Yangtepnü agintsüogo. Iba film nung Sara Ali Khan aser Sushant Singh Rajput nati tongti shilem agir.
Chief Justice Naresh Patil aser Justice M S Karnik nati kümtetba bench kati telok anaprongla ken o angadanger public interest litigation (PIL) benoka aliba agintsüogo, ta PTI sangdong ka ajanga metetdaktsü.
Iba ken o ka obendanger ana; Prabhakar Tripathi aser Rameshchandra Mishra nati benok aser ashiba agi, film koba 2013 Uttarakhand tzümetsüng lendong sülen atalokba ama tangoka lir, iba ajanga tamangba yimsü tsütsü nüburtem temulung yirutsür.
“Film otsü ya Purapuji lir aser iba otsü dak tamang akatsü mali. Uttarakhand nung lendong ataloka Hindu nunger temeshi aine aoer aika taküm samaba mapang ka dak ajemdaker film nung Hindu Brahmin tetsür ka aser Muslim nunger tebur ka mimtepba indang sayur,” ta ken o ashishirtemi ashi.
Parnokisa iba film ajanga Lord Kedarnath jenjang ajemtsür, ta ashi.
Iba ken o ya Central Board of Film Certification (CBFC) aser film producer temi anemogo.
Film producer tem tenüng nung senior advocate P Dakhepalkar-i bench dang ashiba agi, movie ya temeimteper otsü ka dang lir koba Kedarnath nung amendaker yangluogo.
“Film ya jenjang aser tamangba yimsü balala nisung ana mimtepba otsü ka lir aser nisung kar temulung yirutsütsü nükjidong nung yangluba masü,” ta pai ashi.
“Iba dak alia film background nung temple ka sayuba ajangabo asenok temulung yirutsüsa masütsü. Pei bilemba lemsateptsü asoshi temeden ajak onok nem agütsütsüla,” ta paisa ashi.
Dakhepalkar-i ashiba agi, iba ajanga nisung karbo temulung yirur alitsü akok saka iba sülen okadak manidaktsü.
“Iba melena okadak ajanga onoki inyakyim shidak benshi mebenshi aser film certification angu mangu aji asadangtsüla,” ta pai ashi.
CBFC’s counsel Advait Sethna-i bench dang ashiba agi, film ka nem temelaba agütsütsü asoshi board-i temzüng tesashi yanglua lir.
Iba film ya nüburtem dang sayutsü asoshi board-i tinyaktsü maparentem ajak inyakogo, ta paisa ashi.
Sethna aser Dakhepalkar napronglai Gujarat aser Uttarakhand nung okadak ajanga ibala mesükba tashishiba magizüki liasü, ta ashi.
Ajisüaka ketdangsertemi mongintem telok ka tenteta online nung film indang trailer aser poster tem prokshir aliba asadangtsü shidang koba CBFC mesera ibala mesükba lokti tentet kechaia masadangi lir.
Iba film nung Sara-i upper-class Hindu pilgrim Mukku shilem agir aser Sushant-i, Mansoor shilem agir.
Kedarnath film ya Abhishek Kapoor aser Ronnie Screwvala nati külemi produce süogo aser Luchii/Dec 7 nü sayatsü renema lir.