Keishing asüba atema mangyimer: K Therie

Kohima, August 23 (TYO): Taoba mapang Manipur nung pezübenren tashi Chief Minister, Rishang Keishing alima nungi pilaba osang angazüka mangyimer, ta tanü NPCC Tir, K Therie-i sangdong ka ajanga metetdaktsü.
“Alima otsü nung mapang talangtiba MP inyaksangji pa lir. 16 Point Agreement sülen pa, Nagaland Integration Council nung General Secretary inyak. Pai Integration Council candidate ama toktep aser tesülen iba atema inyakertemi pa tamakok ngudaktsü. Ajisüaka pa yimtenren nung inyaka aruba ajanga pai yimtenren aser putiotsü tesendaktep nung senmang tajung yutsüogo,” ta paisa metetdaktsü.
Calcutta university nungi graduate asüsang, Keishing-i tesayur, Head Master, MLA, Cabinet Minister, AICC Member, MP (Lok Sabha), MP (Rajya Sabha), Deputy Chief Minister aser Chief Minister ama nüburtem tenzüka aru.
“Pai küm 60 tashi nüburtem tenzüka aru. Pai nübur tenzükba mapang aika ajangshia aruba ajanga pa taküm aliba osep ka ama kümogo. Pa tanela nungi onoki maneni tashi angutsü,” ta Therie-isa metetdaktsü.
“Kü den NPCC-i mangyimer kibong den mangyim lemsateper, Tsüngremi iba ama mangyim mapang nung parnok nem tesüneptsüba agüjang ta onoki sarasademtsür. Pa tanela tesünep nung anisüngzükdakjangma,” ta NPCC Tirisa metetdaktsü.