Kejong Chang-i Phek nung Horti Office building semzüktsü

Dimapur, June 08 (TYO): June 8, 2017 nü Phek nung District Horticulture Officer office building tasen semzükogo, iba sentong nung tongti tejaokerji Horticulture Parliamentary Secretary, Kejong Chang liasü.
Iba sentong nung jembidang Kejong Chang-i, nüburtemi menungitra iba ofiice junga maotsü, ta ashiba den külemi ajaki kanga meranga inyaktsü ayongzük.
Paisa, asenok nükjidong ataloktsü atema lenla ajak nung temelenshi nüngdak, ta ashi.
Nüburtem tenzükba mapa nung department-i meranga inyaktsü ajungshia Kejong Chang-i, lenmang tezüba asaa sen marshitsüla, ta ashiba den külemi terenlok alitsü atema nüburtemi amaliteptsü ajungshi.
Sentong nungsa tetushi tejaoker, Phek Deputy Commissioner, Kovi Meyase-i Parliamentary Secretary dang pelaba metetdaktsüba den külemi Zhamai nungertemi aonsotsü tapu balala aika züngsentetba atema tenüngsang agütsü.
Iba sentong ya Horticulture Secretary, Alan Gonmei IAS leniba nung agi aser DHO Phek, Moalemba-i tepela anküp o jembia liasü.