Kejriwal-i CM mapa nungi anentsüla: Delhi BJP

New Delhi, October 04 (Agencies): Mongolbarnü BJP Delhi unit-i Chief Minister Arvind Kejriwal-i Pakistan atema otongdar ama jembishinüba aitsüogo aser New Delhi nung par kidang aliba office kima pa mapa nungi anenang ta longkak ait.
Bharatiya Janata Party Delhi telen nung tekolak, Satish Upadhyay aser Delhi Assembly nung Opposition lenir Vijender Gupta nati anir longkak aiter noklang aika Kejriwal’er kidang pa office kima adenshia Chief Minister anema yimyim ayim.
Bharatiya Janata Yuva Morcha nung züngsemtem aser minority temia iba longkak aitba nung shilem agia liasü.
Parnoki, “Hafiz Saeed’er tembarji linük ashioktsürtem lir. Hafiz Muhammad Saeed ya Lashkar-e-Taiba telok tenteter rongnung ka lir aser tang ya pa ozüng alema anentsür aliba Jamaat-ud-Daawa telok nung tekolak lir,” ta ayim.
Ajisüaka mapang tatsüka lir külen Delhi Police-i item longkak aitertem senshidaktsü.
Modi-i Pakistan anema mapa tulu inyakba atema Hombarnü Kejriwal-i pa nem tenüngsang agütsü aser Islamabad-i olulu prokba temai adoka metetdakjang, ta ashi.
Pakistan-i, Line of Control (LoC) nung kiralongrartem indang rocket akahba tesem meraksatsü ta ashiba sülen AAP lenir, Kejriwal-i Video osang tatsüka nung iba indang kanga sashia jembi. Pai Modi dang Pakistan nunger den ali nung raraba amai iba olulu anema raratsü shiogo.
AAP leniri iba o jembiba ajanga Pakistan taliang tasü itdaktsür, ta Congress-i ashi.
“Pai Pakistan atema otongdar aser Saeed-i jembiba mesüka jembir. Pai India military tasümait kümdaktsür,” ta Upadhyay-i osangbenertem dang ashi.
“India Military Operations Director General-i osangbenertem den senden ka akadang LoC nung surgical strikes asüba osang metetdaktsü. Kejriwal-i linük sorkar nung telemsa adoktsüsa jembir. Pa ama lenir kati ibala o mejembitsüla,” ta Upadhyay-i ashi.
“Pai akseta mapa nungi anentsüla,” ta BJP leniri shisem.
Upadhyay-isa, “Kejriwal anema iba longkak ya maneni tuluba aotsü,” ta metetdaktsüogo.
September 18, 2016 nü Uri, Kashmir nung India sepai 19 tashi kiralongrartemi tepsetba sülen India army-i September 28, 2016 nü LoC nung surgical strikes aoba mapang kiralongrar indang rocket akahba tesem tenet poksatsüogo.