Kejriwal-i Health minister dang nungi sübokrem agiogo: Mishra

New Delhi, May 07 (Agencies): Delhi Water Minister menden nungi anentsüsang, Kapil Mishra-i tanü, Chief Minister, Arvind Kejriwal-i health Minister, Satyendra Jain ket nungi sen crore 2 agiogo, ta tai tongloktsü.
Yashi Mishra minister menden nungi anenja liasü, aser tanü New Delhi nung Mahatma Gandhi Memorial, Rajghat nung osangbenertem den jembidang pai, “Jain-i Kejriwal nem par kidang sen crore 2 agütsüba ni nguogo,” ta sangdonga liasü.
Iba osang jungkai adokba sülen lokti atema inyaker, Anna Hazare-i, AAP tongti, Arvind Kejriwal nem ochimashi tai tongloktsüba osang angashia mepelar, ta ashi.
Tanü osangbenertem den jembidang Hazare-i, “Tesüiba küm 40 tashi ni ochimashi anema rara ayongzüka raraa arur, aser mapang ka nungbo Kejriwal-ia ni nungita inyaka aruogo. ‘India Against Corruption’ ajanga Kejriwal-i Delhi CM jenjang ajangzüktet. Ajisüaka tangbo pa anema ochimashi tai tongloktsübaji tejashitsü osang ka lir. Ni kechi anga mejembir,” ta ashi.
Ajisüaka Hazare-i Kejriwal nem tai tongloktsübaji pai amanger asü mamanger’ar iba indangjibo kecha mashi.
Ano külen AAP lenir, Kumar Vishwas-ibo Arvind Kejriwal pusema jembiogo.
Osangbenertem den jembidang Vishwas-i, “Küna tsüngda mangatettep adoktsüa akok, o mebangjemtsüa akok, mesüra raratsüa akok, (saka) ni küm 12 tashi Arvind meteta lir aser ni ashitsü agi, pai sübokrem agi mesüra ochimashi inyak ta asübaji ni mamanger aser pa indang tsükchirtemia aji mamangtsü,” ta ashi.
Kapil Mishra-i, “Chief Minister Arvind Kejriwal-i health minister Satyendar Jain ket nungi sen crore 2 agiba ni nguogo,” ta sangdonga liasü.
Ano taoba Aam Aadmi Party MLA, Devinder Singh Sehrawat-i, Cabinet minister Kapil Mishra-i jembiba o ajanga Arvind Kejriwal’er sorkari ochimashi mapa inyakba jungkai adoka sayur, ta aitsü.
Kejriwal-i CM menden nungi alutsüla: Delhi BJP
Kasa onük nung tanü Delhi unit BJP-ia Chief Minister Arvind Kejriwal-i ochimashi sen crore 2 agiba atema pa menden nungi alutsüla, ta takhangba agütsüogo.
Delhi BJP tongti, Manoj Tiwari-i, Kejriwal-i pa tangatetba tajung lira Chief Minister menden nungi alutsüla, ta ashi.
Tiwari-isa, pai Delhi Lt Governor, Anil Baijal ajurua iba tatalokba ken o nung tiyongtsüi ia inyaktsü mepishitsü, ta metetdaktsü.
Osangbenertem senden ka nung BJP tongtii, “Kejriwal-i pasasa manenra Lt Governor-i ibaji shisadangba sülen Tir dang Delhi nung AAP sorkar anentsütsü atema benoktsüla,” ta ashi.
“Kejriwal-i tangatetba nung pasasa anentsüla, kechiyong sorkar minister, Kapil Mishra-i pai ochimashi inyakba tai tongloktsüogo. Iba dak sendakba nung ni Lt Governor ajurua jembitsü,” ta metetdaktsü.
“Jain-i Kejriwal nem sen crore 2 agütsüba indang jembiba ajanga pa (Kapil) anentsü. Pai iba indangji Lt Governor danga shiogo,” ta Tewari-isa ashi.
Kejriwal-i CM menden nungi alutsüla: Congress
Kasa onük nung tanü Delhi Congress tongti, Ajay Maken-ia ochimashi tai tongolokja aliba nung ajemdaker CM, Kejriwal-i menden nungi alutsüla, party-i ochimashi anema inyaktsü nangzük, saka tamakok nguogo, ta ashi.
Mishra-i Kejriwal nem tai tonglokja alibaji süoki ia agitsü onük ka lir, ta shia Congress leniri, CBI aser anti-Corruption Bureau (ACB)-i iba ken oji agizüktsüla, ta ashi.
Osangbenertem den jembidang Ajay Maken-i, “Mishra-i tai tongloktsüba nung ajemdaker, maneni CM inyaktsü atema pa dak temeten mali. Pai menden nungi alutsüla,” ta ashi.
Ano külen Delhi youth Congress züngsemtemi Deobar nikongdang 5:00 ako nungi tenzüka Kejriwal’er kima longkak aita liasü.