Kejriwal-i July 9 nü Gujarat nung aluyimertem ajurutsü

New Delhi, July 07 (Agencies): Delhi Chief Minister aser Aam Aadmi Party (AAP) tongti, Arvind Kejriwal-i Gujarat Saurashtra tesem nung aliba aluyimertem den July 09, 2016 nü ajurutepa aluyimba tsütsü sensaksemtsü.
Gujarat  nung aliba AAP telen sangdong ka ajanga ashiba agi, July 9, 2016 anepdang Kejriwal Rajkot tayimtsü anenba tesem atongtsü. Iba tesem ya linük Ato Kilonser, Narendra Modi tasoyim lir. Iba sülen pa Somnath temple-i aotsü aser Rajkot-i meyipa arudang pai Saurashtra tesem nung aliba aluyimertem ajurua sensaksemtsü.
Kejriwal-i tang tzünglu maluba ajanga aluyimba tsütsü tebilemtsü aser timtem ajurur  aliba Keshod, Junagadh aser Jetalsar jila tem nung aluyimertem ajurutsü. Item jilatem ya Saurashtra region nung lir.
AAP sangdong ka ajanga ashiba agi, Kejriwal-i aniba teloki Gujarat nunga parnok telok kanga tashi itta amenokner.
Taoba küma AAP-i Saurashtra tesem nung aluyimertem inyakyim nung kanga nungita liasü aser idangji tesüiba mapang BJP MLA aliba tang Gujarat nung AAP lenir tajung kümer alisang, Kanu Kalsariya-i iba tesem nung tzünglu maluba tebilemtsü aser Minimum Support Price (MSP) inyakyim shitak benoka meinyakba tuteta metetdaktsü.
AAP teloki parnok vote angütsü mechi tang ya aluyimertem tebilemtsü, sorkar mapa inyaker aser Gujarat nung Patidar telok tebilemtsütem nung kanga nüngita yaritepdar.