Kejriwal-i minister ka anentsü; Modi nema kasaji inyakdaktsüner

New Delhi, October 09 (Agencies): Hokolbar nü Delhi Chief Minister aser Aam Aadmi Party (AAP) tongti lenir, Arvind Kejriwal-i ochimashi ken o dak sentakba nung Delhi sorkar nungi minister ka menden nungi aludaktsüogo.
Osang ajanga ashiba agi, Delhi nung osangbenertem senden ka nung Kejriwal-i ochimashiba ken o nung tai tongolokja alisang Food & Civil Supply Minister, Asim Ahmed Khan minister menden nungi anendaktsüogo.
Osangbenertem den jembidang Chief minister Arvind Kejriwal-i, “Onok dangi ken o ka aru, aser ibaji reprangshiba sülen Asim Ahmed Cabinet nungi agientsü atema onoki lemtet,” ta ashi.
“Ken o agütsüsang jagi ghonda ka indang audio record ka agütsü, Manish Sisodia (Deputy chief minister) künati iba audio clip ji angadangogo, künati ibaji asadangogo, aser ibaji süoki ia agitsüba ken o lir ta bushitet,” ta Kejriwal-i osangbenertem dang ashi.
Delhi CM-isa, ochimashirtem shinga danga tia matoktsü ta ashi.
“Ochimashi nung aibelenba putetra ni ozü jabaso danga tai matoktsü,” ta pai ashi.
Paji minister ka, ketdangser mesüra tanga asütsüa akok, ochimashi nung aibelenba kuli mengura tai atoktsü, ta paisa ashi.
Delhi Cabinet nung Asim Ahmad Khan melen Ballimaran MLA Imran Hussain shimogo, ta paisa ashi.
Khan-i kisür ka dang nungi sen meshiba atema minister menden nungi anentsü. Menden nungi anentsüba sangdong magütsüdang Kejriwal-i Khan aser kisür na tsüngda jembiba record ji angadakja liasü.
Iba ken oji CBI nem agütsütsü lemtetogo, ta Kejriwal-isa ashi.
Ano külen Kejriwal-i Centre nung BJP sorkar aija, BJP-ia Madhya Pradesh aser Rajasthan nung ochimashi ken o alir minister tem anentsütsüla, ta shiogo.