Kejriwal-i PM Modi bendanglen senzüba aitsür

New Delhi, September 29 (Agencies) : ‘Make in India’ melena ‘Make India’ pusema Delhi Chief Minister Arvind Kejriwal-i Prime Minister Narendra Modi aitsüogo.

“Kechiba Narendra Modi-i bendang linüktem sema senzübr” ta Kejriwal-i asüngdang.

Modi-i Ireland aser US linüktem semdanger meyipa arutsü lia Kejriwal-i pa aitsü.

“PM Modi-i bendang linüktem semdangba ajanga India asoshi kechi tajangzük angur. India Prime minister kati nija company tem den ajurutepa parnok dang shishilembatsü mepishia senzübaji akhümket mapa ka lir na?” ta Kejriwal-i asüngdang.

Hopta piyong Kejriwal-i Modi’er ‘Make in India’ project anema ‘Make India’ ola yoka jembiyonga arur.

Mezüng India-i infrastructure development nung temulung agütsütsüla aser iba jagi investment atsür arutsü, ta Kejriwal-i ashir.

“China nungertemi mezüng China yanglu aser iba sülen China nung company tulutemi shishilembatsü tenzük. Anungji asenoki mezüng India Yangludi. Asenoki India tashitait kümdaktsüra, tangartemi asen linük nung shishilembatsü” ta Delhi chief minister-isa ashi.