Kejriwal-i state jenjang atema draft bill sayaogo

New Delhi, May 18 (Agencies): Tanü AAP sorkari Delhi state jenjang atema draft bill ka sayaogo, iba bill ajanga police, ali aser ketdangsüba ajak Delhi sorkar küboki aittsü.

Iba onük nung party ajak senden ka ayongzüka akatsü ta shia osangbenertem senden ka nung AAP tongti lenir aser Delhi Chief Minister, Arvind Kejriwal-i, tamalen BJP manifesto tem nung party-i Delhi nem state jenjang agütsütsü nangzükba indang metetdakja pai “2003, 2008 aser 2014 kümtem nung BJP election manifesto nung BJP-i parnok sorkar tashii arura Delhi state jenjang atema inyaktsü nangzüka liasü,” ta ashi.

Congress yimsüsüba mapang nung Delhi nem state jenjang magütsüba atema BJP-i Congress kanga aija liasü, ta paisa ashi. “Iba onük nung yimtenren tajangzük atema meinyakdaktsüner, party ajaki iba atema mulunger,” ta pai ashi.

“BJP lenirtem Vijay Malhotra, Dr Harshvardhan aser Vijay Goel nungeria Delhi state jenjang atema jembia aruogo,” ta paisa shisem.

Kejriwal-i, “Iba onük nung BJP-isa timtem timba ajangshiogo. Parnoki mapang shia iba onük benok. Onokibo parnoki latetba benoker dang lir,” ta ashi.

Kejriwal-isa ashiba agi, pai lenir balala dangi shidi zülutsü aser Ato kilonser, Narendra Modi, Home Minister, Rajnath Singh, BJP Tir, Amit Shah aser Congress Tir, Sonia Gandhi nunger ajurutsü.

Iba draft bill atema AAP-i June 30 tashi nung nüburtemi tebilemba onüktem benoktsü metetdakja pai, June 30 sülenbo iba draft tatem küma renemtsü aser Delhi Assembly nung bangzüng ka agizüktsü, ta ashi.

“Onoki iba bangzüngji Centre nem agütsütsü aser Constitutional Amendment ka benoktsü,” ta paisa ashi.

“Iba draft ya Delhi sorkar website nung inoktsüogo. Iba ya agizüktetba ajanga Congress aser BJP mangdang ataloktsütsü atema onoki inyaker. Iba bangzüng agizüktsü atema assembly nung temeja senden ka akatsü,” ta Delhi chief minister-isa shisem.