Kejriwal’er sorkar dak tai kecha mangur: High Court

New Delhi, August 11 (Agencies): Tanü Delhi High Court-i, AAP sorkar, koba dang Kejriwal’er sorkar taka ajar, iba sorkar dak tai kecha magur, ta shiogo.

Aam Aadmi Party (AAP) sorkar dang ‘Kejriwal’er sorkar’ ta ajaba anema ken o ka benoka aliba angadangba sülen Chief Justice G Rohini aser Justice Jayant Nath nati akümba bench kati, “Sorkar ajaki yamaji inyaker. Onoki ibaji nguogo. Iba nungji kecha tai mali,” ta ashi.

Supreme Court tetuyuba ajanga, saruji yimtenren lenir tenüng ajungkettsü atema mamshitsüla ta shia lir, saka Delhi sorkari iba tetuyubaji anema maneni inyaker, ta benoka liasü.

Congress lenir Ajay Maken-i affidavit ka ajanga, Delhi sorkari Government Advertisement (Content Regulation) Guidelines, 2014 anema advertise asür ta benokba nung sorkari telangzüba agütsübaji court-i reprangdangogo.

Maken’er counsel-i tanü court dang, temzüng nung lateta aliba anema advertise maneni agütsür aser Chief Minister Arvind Kejriwal den party tenüng ajungketba advertise maneni agütsür ta shiogo.

High court-i item onükji September 1, 2015 nü angadangtsü renema yuogo.

August 3, 20-15 nü Delhi nung AAP sorkari High court dang, May 13, 2015 nü Supreme Court-i tetuyuba agütsüba sülen ita asem tsüngda parnoki advertisement nung sen crore 22 tashi intokogo ta asüba osangji tai lir, ta shia liasü.