Kekhrie-i Nagaland Assembly by election nung tokteptsü

Kohima, June 02 (TYO): Lokti atema inyaker, shisashir aser kaketzülur, Kekhrie Yhome-i, pai 10-Northern Angami-1 Assembly Constituency menden by election nung tokteptsü, ta Brihostibarnü sangdongogo.
Iba menden ya MLA, Khriehu Liezietsu-i azüngtettsüogo.
May 24, 2017 nü Khriehu-i tebu aser tang teinyakdak Chief Minister, Dr. Shürhozelie Liezietsu atema lenmang lapokja azüngtettsü. Ajisüaka tang tashi nungbo Election Commission of India (ECI)-i by-election atema telemtetba agiba sangdonga mali.
Yhome-i iba election nung tokteptsü sangdongogo, aser pai yimtenren nung tain, Dr Liezietsu den tokteptsüsa akumtsü.
Yashi nikongdang Kohima nung osangbenertem den jembidang Yhome-i pai Independent candidate ama tokteptsü asü party kar ticket nungi tokteptsüar ibajibo memetetdaktsü.
By-election nung tokteptsü atema kechiba nai telemtetba agi ? ta asüngdangba langzüdang Yhome-i, yimtenren nung tangatetba agi anüngba aser sen dang bilemba yimtenren, iba den külemi terenlok aser temelenshi nung tangatetba agi anüngba anema tashikar lanuri dang inyaktettsü, ta ashi.
Teranabuba Nagaland Legislative Assembly tashimaitba dak sendakba nung Yhome-i, nüburtemi maginüba tatalokbatem aika atalokogo, ta ashi.
Iba dak sendakba nung pai, tesüiba küm pezü tsüngda Nagaland nung Chief minister asem tashi liasü, aser pezübubajia arutsüsa tensa ka nung lir, ta ashi.
Yhome-isa, item ama tia maka tatalokbatem ajanga yimtenren, yimsüsüba aser tesünep kongshiogo, ta ashi.
“Asen teimla balala ajanga asen tarutsü yanglur. Ajak atema tarutsü tia junga yangertsü asoshi ajaki longjemer inyaktsüla,” ta paisa ashi.