Kekhrie Yhome den nisung anati by-election atema tenüng agütsü

July 12, 2017 nü 10-NA-I A/C by-election atema Independent Candidate, Kekhrie Yhome (sü abener aliba) den dummy candidate Neitsu Khezhie aser tangartem tenüng agütsüba sülen aludang agiba noksa angur. (Kohima, July 12)

Kohima, July 12 (TYO): NPF-i aniba DAN sorkar nung tashi raktepba mapang ka nung, tazüngtemeteter aser social activist Kekhrie Yhome-i tanü 10-Northern Angami-I Assembly Constituency by-election atema tenüng agütsüogo.
Arishi küm 41 tain Kekhrie Yhome ya tazüngtemeteter nungi politician akümba nisung ka lir aser pai July 29, 2017 nü tang teinyakdak chief minister Dr. Shurhozelie Liezietsu den tokteptsü.
Iba by-election atema Dr. Shurhozelie-i yashi tenüng agütsüogo.
Bodbarnüsa 10-Northern Angami-I Assembly Constituency bye-election atema dummy candidate anati tenüng agütsü. Kaji taoba Parliamentary Secretary Khriehu Liezietsu-i tebu Dr. Shurhozelie atema aser Neitsu Khezhie-i Kekhrie Yhome atema tenüng agütsü.
Tenüng agütsüba sülen osangbener den sensaksemdang, Yhome-i ashiba agi, “ita ti anünga aliba nung nübortemi aginüba ama mapa aika inyatettsü.”
Election atema nüboyimba sentongtem nung pai lanurtem aser Naga nungeri temelenshi aginüba indang osang prokshitsü, ta Yhome-isa metetdaktsü.
Election Commission aser Nagaland Baptist Church Council ajanga arogotemi election merüka agitsü atema asenok dang kanga nendaka ashir. Anungji election nung pai vote alizükba mesüra ayokba indang mapa meinyaktsü, ta Yhome-isa shisem.
Nübortemi sen tashi mesüra public indang ola tsüngda shimtsü atema telemtetba agitsüla, ta paisa ashi.
Lennir tain kari kü dang by-election nung metokteptsü atema ashi. Tanga yimten telok atema inyakertem lir saka election nung tokteptsübaji democratic temeten ka lir aser nisung ajaki tokteptsü akok, ta Yhome-isa metetdaktsü.
Osangbenertemi pa dang takok angutsü asü masü ta asüngdangdang, “takok angutsübaji tasak asütsü saka taruba ita ti atema sorkar nung shilem ka sür mapa inyaktettsü imlar” ta Yhome-i langzü. Paisa, teyari meshitsü atema vote agütsür ajak den ajuruteptsü merangtsü, ta shisem.
10-Northern Angami-I Assembly Constituency by-election nung tokteptsü atema tenüng agütsüba anogoji tanü tatembang liasü aser asüng kulikakettem reprangtsü. Tenüng meyipa agitsü atema tatembang anogoji July 15, 2017 nü asütsü.
Iba by-election ya July 29, 2017 nü polling station 25 nung anepdang 7:00 ako nungi nikongdang 4:00 ako tashi agitsü. Votes ji August 3, 2017 nü azüngtsü aser iba election dak sendakba maparen August 5, 2017 nungbo tembangtsüla.