Kelei Zeliang-i Wokha nung Multi Purpose Building semzüktsü

Dimapur, July 12 (TYO): July 11, 2017 nü public ground Wokha anasa Rural Development Secretary, Kelei Zeliang-i Wokha District Village Council aser Village Development Board Association indang Multi-Purpose building semzüktsü.
Iba sentong nung jembidang Kelei Zeliang-i department, VDB Association aser VCC-i meranga inyakba ajanga iba building takok ngua renemogo, ta pelaba metetdaktsü.
Direct Benefit Transfer funding inyakyim October 1, 2017 nungi melenshitsü ta metetdakja pai yimdak lenirtem aser ketdangsertem dang, item tajangzük angutsü atema yimdaklirtem dang nija bank accounts lapoktsü ajungshitsü nüngdak, ta ashi.
Wokha Deputy Commissioner, Wezope Kenye-ia, iba building tasenba ajanga district nung nüngdak aika peritsü ta metetdaktsüba den külemi yimdaklir ketdangsertem dang pei mendenji maongka ama agia khuret abenba lenir kaka asütsü ayongzük.
Kasa sentong nungsa WDVDBA aser WDVCC Tir, Nagaland State VDB Association Tir, Tohoshe Awomi-ia jembia liasü.
Executive Secretary, Lotha Baptist Ekhumkho Sanrhyutsu (KBES), Wokha, Rev.Nyan Lotha-i iba building meshiteta sarasademtsü. Iba sentong ya Project Director, DRDA, Thungdeno Mozhui leniba nung agi aser WDVDBA tatong Tir, Zanbemo Kithan-i tepela anküp o jembia liasü.