Kelly Clarkson-i The Voice US nung shilem agitsü

May 12, 2017 (Agencies): US indang ‘The Voice’ season 14 nung coach mapa inyaktsü atema Kelly Clarkson shimogo.
ABC indang ‘American Idol’ nunga arishi küm 35 tain, Kelly Clarkson ya judge ama shilem agidang nüburtemi kanga sabua liasü. Lai 2002 küm ‘American Idol’ akok saka la ya NBC indang ‘The Voice’ US nung ang tongti shilem agitsü asoshi tang ya maparen balala inyaktepba mapang ka lir.
Aser ‘Piece by Piece’ ken atenlai lar medemer aser US indang ‘The Voice’ nung coach, Black Shelton dang lai akoktsü, ta shiogo.
“NBC nung ‘The Voice’ nung shilem agitsü maongka anguba asoshi ni kanga pelar,” ta Adam Levine aser Miley Cyrus nunger den külemi shilem agütsü alila, Kelly Clarkson-i ashi.
“Coach mapa inyaktsü asoshi mapang talangka atsütepa aruogo saka mapang metemsüi lia aruogo. Iba show nung ni shisa agütsür ka ama mesüra kentener ka ama shilem agitsü kanga jangrar aser Christmas special nung ni parnok den tesendaktep tajung yangluogo. Kü indang chair meyiba tejak tasen, sempet tajung aketba artist tasentem yaritsü matateter. Kümdanga liang Shelton, ni akoktsü asoshi arur!” ta lai ashi.
‘American Idol’ nung ang shilem agitsü südi, ta olulu angashir anogo ka majungdang iba osang sangdong.
Kelly-i ‘American Idol’ akokba sülen iba show ketdangsertemi la iba sentong nung tetendanger mapa inyakdaktsütsü jangra liasü.
‘Since You’ve Been Gone’ ken atenla ya ‘American Idol’ nung tetendanger mapa inyaktsü tejangraba meliaka lar telokpurtemi la iba show nung shilem agidaktsütsü asoshi mapang lapoktsü, saka iba show ya 2016 küm shibang.
2004 küm ‘American Idol’ nung 7buba jenjang tongtetla, Jennifer Hudson-a US indang ‘The Voice’ nung coach mapa inyaktsü shimogo.
Iba osang angashidang tenük nungi nüktzü alu, ta ‘Dreamgirls’ actress, Hudson-i Instagram nung metetdaktsü.
“Tetokteper ka ama shilem agia arur iba amala maongka ngua item menden nung UK nungi arua US nung amentsüa ta shibai bilem! Tsüngremi dang! Saka ni iba maongka ngutetogo!” ta Jennifer-i Instagram nung zülutsü.