Ken atema Tsüngrem tenüng sangang – 2 Putipuyang 5:7-14

Laishiba nung ken ajanga shilem tulu agiba shia lir. Lipok nungi Jungkai Adokba tashi nung kentenertemi Pa asoshi inyakba shia lir. Ken ajanga tekülemer ajungmesor, rarai, yoker, tejashir mulung süneptsür, tanela jangrudaktsür, takokba lemsateper aser tesama ajurur nüktzü lemsateper. Ken ya mapang ajak den tapet, ajaki inyaktetba sempet rongnung ka. Kari ken anishir aser kari atener, ken kar temela aser ken tasak lir, kentenba nung oset temela aser tasak amshir. Kensü ola tapu balala aika lir. Kar tenemi atener, kar karara atener, kara tasa (high) aser kar tanem lir.
Ken ya arogo tatishitsü ka, kechiyong ajaki pai akokba nung tajungtiba shilem agir. Mapang balala nung ken balala asenoki atener. Komaka kenji junga angazüker yamaji ken sayuri sayuba ama tenteter aser kenji tobur tajungba adoker.
Tenüngsangba nung kenji tajungtiba amshir. Kodang Solomoni tenla ki renem, kentenertemi Tsüngremi nüngsangba ken aten. Parnoki ken atendang “Kibuba sentsüwangshi agi Tsüngrem kiji asüng” (II Puti 5:14)
Tobur tajung ken asoshi Tsüngrem tenüng sangdi, kechiyong ya kotak li mesüka lir kong Tsüngrem sentsüwangshi tatem makai alitsü aser Pa nüngsangba manentsü”. Julie Ackerman Link.
Kibuba moajang aser Pa nüngsang ken tenüng,
Kibuba moajang, o kü nela
Kotak tonga ajaki tenang
Pa nüngsangba ola ayimokjang- Peterson