Ken mejemer Aadesh cancer agi shiranga süogo

September 05, 2015: Bollywood nung kentener aser ken mejemer Aadesh Shrivastava ya cancer agi mapang talanga shiranga lir külen arishi küm 51 nung iba lima nungi pilaogo.

Shrivastava ya Kokilaben Dhirubhai Ambani hospital, Andheri nung anogo 40 dak tema cancer treatment agia liasü.

“Arishi küm 51  Aadesh Shrivastava September 5 anepdang 12:30 ako nung cancer agi shiranga Kokilaben Hospital nung süogo,” ta Kokilaben Dhirubhai Ambani hospital nung Dr Ram Narain-i PTI dang ashi.

Pai kinüngtsü, ken mejemer ana, Jatin & Lalit na aianu aser taoba mapang Bollywood actress, Vijeta Pandit den jabaso ana– Anivesh aser Avitesh nunger yutsür iba lima nungi pilaogo.

September 4 nü ken mejemer, tanük Lalit Pandit-i, “Pa chemotherapy agidar saka kecha temelenshi maliba ajanga doctor temi anendaktsüogo. Doctor temi teyari tapu balaka agütsüdar aser Aadesh-ia ibaji junga tizüker,” ta PTI dang shia liasü.

Küm pongu tejakdanga pa cancer tashidak agi kangshia liasü aser iba kasa tashidak agi pa dak ano tanaben menep. Pa mozü kidangi anir aodang nungi kanga teimla makai liasü.

“Kanga, kanga, kangasa osang tamajung. Aadesh Shrivastava kanga kara alima nung pilar,” ta film director Anubhav Sinha-i twitter ajanga lemsatepa liasü.

Pa taküm lia ken mejem tenzüker külen “Chalte Chalte”, “Baabul”, “Baghban”, “Kabhi Khushi Kabhi Gham” aser “Rajneeti” film tem dena pai Hindi film 100 dak tema asoshi ‘music’ mejemtsüa lir.

Pai mezüng 1993 küm  “Kanyadaan” film asoshi ken mejema liasü saka iba film masayatetba ajanga item kenji shingaia memetettsüsa aküm.

Pai ken aika mejemba rongnung  “Kya ada kya jalwe tere Paro”, “Haathon mein aa gaya jo kal”, “Sona sona”, “Shava shava”, “Gustakhiyaan”, “Gur nalon ishq mitha” aser “Mora Piya” kentem ya tajung kar lir.

2005 aser 2009 küm nung “Sa Re Ga Ma Pa” sentong nunga pa tetendanger ka ama liasü.

Shrivastava-i mezüng “Sanaa” film yanglu aser iba film ya tanur teküp ayokba otsü nung ajemdaker yangluba lir.

Pa manemba mapang Amitabh Bachchan aser Shah Rukh Khan nati pa temang asoshi mapangshia osangola-a liasü.

“Ken mejemer Shaan, Sonu Nigam, Kumar Sanu, Alka Yagnik aser Udit Narayan nunger den actor Shekar Kapur, Govind Nihalani aser Poonam Dhillon nungeria pa mozü kidang aliba mapang teti semdanga liasü,” ta pai ashi.