Ken o jembiba ajanga dang climate change akoktsü: PM Modi

New Delhi, August 05 (Agencies): Honibarnü Ato kilonser, Narendra Modi-i, ken o jembiba ajanga dang kiralongra aser climate change densema alima nung tayongzükba aika koktettsü, ta ashi.
2buba “Samvad”- Global Initiative on Conflict Avoidance and Environment Consciousness senden nung video ajanga jembidang Modi-i, “21 aso nung alima linüktem kati ka dak metaloka lir; ken o jembiba ajanga dang tayongzükbatem koktettsü,” ta ashi.
Ato kilonserisa, “Ni ya akhi India sobaliba nung intet, aser iba sobaliba ajanga tongtibang onüktem atema ken o jembiba nung tamang akar,” ta ashi.
“Alima nung linüktem tsüngda rara metsüh prokba aser lokti tsüngda telemsa adokba koktettsü atema lenmangji Samvad (ken o jembiba) ya dang lir,” ta pai ashi.
India nung mythology- Lord Rama, Lord Krishna, Lord Buddha aser Bhakta Prahlada nunger tatishitsü amshia Ato kilonseri, parnok ajaki ‘Dharma’ ajungkettsütsü atema inyak, koba ajanga India nunger akhidang nungi tan putu tashi liteta arur, ta ashi.
Alima wazüka ayutsü dak sendakba nung Ato kilonseri, nisung shia alima kümzüka ayutsüla aser meraksatsütsüla, ta ashi.
“Nisung kati alima anepalua wazüka meyura alimai tsüngsang mopung melenshitsür. Nisungi alima den tesendaktep ayutsüla,” ta paisa ashi.
“Aso 21buba lima nung alima linüktem sendaktepa lir aser kati ka dak metaloka lir; alimai kiralongra nungi tenzüka climate change tashi tayongzüka aika ajurur. Ni amanger, Asia nung sobaliba tejentiba (ken o jembiba) ajanga dang item ya koktettsü,” ta Ato kilonseri metetdaktsü.
2buba “Samvad” anogo ana senden ya Yangon (Myanmar) nung ayongzüka amonger.
2015 küm September ita nung Vivekananda Kendra-i mezüng iba senden ya New Delhi nung ayongzüka among.