Ken o jembinera US tanaben meyipa arutsüla : Iran

Tehran, Chiteni 31 (Agencies) : US Tir, Donald Trump-i ken o jembinera pai tanaben ‘international nuclear deal’ koba pai pasasa taküm 2018 küm tetenzüklen toktsür ao, iba dang jagi meyiptsüla, ta tanü Sangtennü Iran nunger ketdangsertemi ajang-ajanga metetdaktsüogo.
Iran nunger den tezüngzüktep agitsü atema ken o lemtepa jembiner, ta Trump-i metetdaktsüba meyiper langzüa parnoki ibaji metetdaktsü.
Yashi Trump-i ashiba agi, Iran lenniri dang mulungra Iran Tir, Hassan Rouhani den ajuruteptsüji paibo mulunga dang lir.
“Nuclear dak sendakba nung otsü asütsüsa tanü asenok kechiang mesayangba tensa ka nung nokdaka lir aser United States-i tapi agi dang par mulungka agi toktsür aenshiba melena Europe nungertemi tapet teinyaktsü maparen inyaktsüla; ibaji Iran lima asoshi kanga dang tongtibang asütsü,” ta British Ambassador tasenba, Rob Macaire den keno jembiba sülen Rouhani-i metetdaktsü.
Britain, China, Germany, France, Russia aser European Union-i nuclear dak sendakba nung tezüngzüktep agia alibaji wazüka ayutsü asoshi Iran den tangatettep kati arutsü merangdagi, ta kasa osang ajanga metetdaktsü.