Ken o jenti bentettsü atema obendanger 70,000 nüngdaker: CJI

Cuttack, May 08 (Agencies): Deobarnü Cuttack nung sentong ka alidang Chief Justice of India (CJI), TS Thakur-i, küm aika court tem nung ken o jenti bendena aliba bentettsü atema India-i obendanger tajemba agi 70,000 nüngdaker, ta ashi.
Orissa high court-i ayongzükba sentong ka nung jembidang, Chief Justice Thakur-i obendangertem agi anüngba aser obendangertem shimtsü inyakyim menoba tebilemtsü atema jembia liasü.
Thakur-i, obendang tekaraba nung agütsütsü atema sorkari obendangertem shimba maparen kera inyaktsüla, ta ashi.
“Obendangertem shimba maparen kanga mezülongi inyakba ya tai maka. Obendangji  temeten ka aser nüburtem nem aobendang magütsütsü ta sorkari meshitettsü,” ta paisa shisem.
Tawa New Delhi nung sentong ka nung jembidanga Justice Thakur-i iba dak sentakba onük jembia liasü.
Obendangertem shimba maparen mezülongi inyakba dak sentakba nung Thakur-i, linük nung okadak balala nung ken o crore 3 dak tema nangdena lir aser high courts nung ken o lakh 30 dak tema bendena lir. High cout tem nung obendanger 900 lemzükja aliba nungi menden 450 shi tazüng lir, ta metetdaktsü.
Paisa, 1987 küm sorkari akümba Law Commission-i India linüki obendanger 44,000 shi nüngdaker ta shiogo, ta shisem.
“Ajisüaka küm 30 sülena onok nübo kanga ajema inyaker. Tang linük nung obendanger 18,000 lir. Asenoki nütsüng den medemdangra, ken o bendena alibatem bentettsü atema  obendanger 70,000 dak tema nüngdaker. Iba ya tayongzükba tulu ka lir,” ta Justice Thakur-i ashi.
Item timtem liaka nüburtemi judiciary nung tamang akar, ta pai ashi.
“Tesüiba küm ishika tsüngda nüburtemi judiciary nung taliba tamang akar. Iba ya ajanga asen tayongzükba tuluba kümdaktsür, kechiyong parnok nem ochi obendang agütsüba ajanga nüburtemi asenok dak tamang kateter,” ta paisa shisem
Tawa New Delhi nung Chief minister tem, High court nung chief justice tem aser Supreme Court obendangertem külem senden ka nung jembidang Thakur-i,  ken o jenti aliba India Judiciary atema obendangertem-nütsüng ratio ji kanga majung, ta ashi.
Tanga terenlok linüktem den metemdangra India nunger obendangertem-nütsüng ratio ji tajentu kata masü, ta paisa ashi.
“Iba ya aitsüba agia meperi. Nenoki khuret ajungaji obendangertem nem magtsütsüla” ta shia Thakur-i, küm ka nung American Supreme Court nung obendanger 9 senteper ken o 81 lateter, ajisüaka Indian Supreme Court nungbo küm ka nung obendanger kati ken o 2,600 lateter, ta ashi.