Kendok kümzüktsü atema Assam-i SRPF tenzüktsü

Guwahati, July 02 (Agencies): Assam nung tezü ka aketba kendok kümzüktsü atema state sorkari Special Rhino Protection Force (SRPF) tasen ka tenzüktsü, ta state minister kati metetdaktsü.
Assam Forest Minister, Pramila Rani Brahma-i, “Iba Force atema sorkari maparen tenzükogo. Iba force nung lanur 90 shimoktsü atema tawa onoki advertisements agütsüogo,” ta metetdaktsü.
Parnok shimba sülen training agütsütsü, aser iba maparen ajakji taküm August ita tashi nung tembangtsü, ta laisa ashi.
Brahma-i ashiba agi, iba force nung lanurtem shimoktsü atema telatet tongtibangtibaji, Kaziranga national park anasa alirtem asütsü.
“Iba force nung adentsü atema district asem- Nagaon, Golaghat aser Karbi Anglong nungi lanurtem ajungshir. Iba tesem anasa alirtem aser iba tesem junga meteta alirtem shimtsü onok tebilemba lir,” ta minister-isa ashi.
Iba force nung ketdangser 22 alitsü aser tanüngba rogotemji parnok kübok inyaktsü.
Forest Department-i state home department ajanga prangpong aser injang mangaogo, ta minister-isa metetdaktsü.
Iba force atema prangpongtemji AK rifles aser tanüasüng amshiba prangpong tajungtem asutsü, ta laisa shisem.