Kendriya Vidyalayas-i linük wako anogoshia asongtsü tuyur

New Delhi, Feb. 28 (Agencies): Central University ajak nungi Vice Chancellor temi pei campus nung linük wako asongtsü tuyuba sülen sorkari ketdangsüba Kendriya Vidyalaya Sangathan (KVS)-ia parnok indang school ajak dang anogoshia linük wako asongtsü tuyuogo.
KVS ketdangsertemi principal ajak dang, anogoshia kaketshirtemi ‘morning assembly’ mapang linük wako nem salem agütsütettsüsa wako asongtsüla, ta tuyuogo.
KVS nung Chairperson ji Human Resource Development Union Minister, Smriti Irani lir. KVS-i India aser bendanglen school merirjang ka dak tema ketdangser.
Parliament nung JNU dak sentakba ken o nung mangatettep adoka o atsütepba mapang ka nung item tetuyuba agütsüogo.
KVS Additional Commissioner, UN Khaware-i regional office ajak dang, “India linük wako ya asen akhümket aser linük nüjiso temaitsü lir ta nenok ajaki meteta lir. Iba ya asenok atema temaitsü tulu ka lir. Asenoki asen linük wako indang ajak meteta alitsüla aser akhümtsübutsüla. Kendriya Vidyalaya aser regional office tem nung anepdang shia linük wako asongtsü aser anü maidang agizüka ayutsü tuyur,” ta shiogo.
“Iba dak alia nenok region nung principal ajak dang anogoshia school tanurtemi linük wako nem salem agütsütettsüsa morning assembly agiba tesem nung wako asongtsü tuyuang,” ta paisa metetdaktsü.