Kenten sentongtem nung ni Fifth Harmony ken matentsü: Camila

Aenjeti 02, 2018: Taoba mapang Fift Harmony telok nung alila, Camila Cabello-i, lai la kenten sentongtem nung Fifth Harmony-i atenba kentem matentsü, ta metetdaktsü.
‘She Loves Control’ ken atenla, Camilla-i 2016 küm December ita nung Fifth Harmoy telok tokja liasü. Tang iba telok nung züngsemtemji Ally Brooke, Normani Kordei, Dinah Jane aser Lauren Jauregui nunger lir.
December 2016 nung lai iba telok toktsüba sülen lai solo project tenzüka liasü.
La kenten sentongtem nung lai Fifh Harmoy telok indang kentema atentsü asü? ta asüngdangba langzüdang lai, ”Nunga….ni matentsü,” ta langzü.
Arishi küm 20 tain, Camilla-i la tarutsü nung rangloker inyaktsü, ta metetdakja liasü.
NME magazine den jembidang lai, ”Ni kodanga iba indangji mebilemdang. Ni memetet, iba ya kü atema lenmang tasen ka lapoker ama ni bilemer,” ta metetdakja liasü.
‘Havana’ ken atenla-isa, lanurtem atema laji tatishitsü model ka lir, ibayongji lai la kentem nung oren tamajung mamshir, ta ashi.
Laisa, lai Taylor Swift aser Demi Lovato ama kentenertem lai nükshir, parnoki lanurtem dang tatishitsü tajung sayuogo, ta metetdaktsü.
Lai, ”Ni keno, arishi küm 10 aianu ka lir, aser ibaji ajanga ni teinyaktsü aika lir. Ni kü taküm nung o tamajung jembiaka ni kü kentem nungbo item orenji mamshiner. Kechiyong lai ni atenba kentem lar medemertem den külemi angar, aser ni parnok nem item ama kenji anidaka metendaktsüner,” ta ashi.
”Ni teti kü melungjang nung lokti bilema inyaker. Ni ainba mapang nung ni Selena Gomez, Demi Lovato, Miley Cyrus aser Taylor Swift nunger nükshia aru,” ta lai ashi.