Kentener Shilpa Rao-i moko anema nokdakba nung shilem agitsü

Shilpa RaoNew Delhi, May 27 (Agencies) : May 31 nü nüburtem ajak World No Tobacco Day amongtsü renemtepba mapang nüngtugu “Khuda jaane” ken atenla, Shilpa Rao-i
moko agi temang raksatsüba shishia bilemer aser temang anema lia pela aliba dak amanger, ta entertainment osang ajanga metetdaktsü.
Cancer tashidak agi shirangertem aser Assam nung tzümetsüng agi kongshir okronga alirtem atema Rao-i tenla sarutsüba sentong aika nung yakbangser inyaka aruogo.
Tashidak aser alima lendong agi kongshir okrongertem den tesentaktep tsütsü asüngdangdang, tang kensep tasenba “Suno” ajungkettsü atema yimti aika nung ken tena tejajadak kentenlai, “Okronga alirtem atema kanga shishia bilemtsüba ajanga ni parnok asoshi teyari lenmang bushiba nung shilem agir. Yaküm Nepal nung menoknok agi kongshirtem atema tenla bendentsü atema music nung mongin Vishal Dadlani-i kü dang ashi. Pai phone nung khen dang ashi aser onok idangjisa adenshi,” ta langzü.
Ano tang World No Tobacco Day tonga aruba mapang lai langkalen nungibosa yaritepner.
“Ni moko nokdangba tsütsü kanga nendaka bilemer. Kari danga iba mapa tajung nung denüa bilema lira kü den tongtepratep nung ajungtsü. Anema aliyim tsütsü inyakba nung ni shilem aginer. Ni kü medemer aser tembar aika dang moko machitsü shiogo,” ta lai ashi
Times Music-i tawa sayatsüba kensep tasenba ‘Suno’ nung nüngtugu ken tejen “Dum a dum” den “Challa”, “Ankhiyan nu rehn de”, “Ankhiyan udeek diyan” aser kentener tejen Nusrat Fateh Ali Khan, Bade Ghulam Ali Khan aser Reshma nunger nüngtem nunga ken kar densema lir.
Tanü asüng tsüngsangba ken kanga saputepba mapang kodaser tamangba kensü ang shim ta asüngdangdang, lai, “Kentener kati tang tatalokdak tsütsü masü saka tang nü mulung nung jembiba kensü aser ojang nung temulung timba agütsür. Item ken ya zülur mapang talangka arur ajisüaka tejen makümer,” ta langzü.
Aji oda süaka tanga kentem asoshia la dak tejangraba lir.
“Ni tang ano alima nung nüngdakba tsütsü ken ka yangludar. Iba ken ya tangang teyangludak lir anungji taküm mesüra sangküm ang sayatsü,” ta “Malang” ken ajanga nüngtugu akümla Rao-i ashi.
Iba den külemi ni film kar atema ken menüngoka lir aser tang item kenji sayatsü atar, ta lai shisem.
Rao-i yimtii balala nung ken tena jajatsü kanga jangarar aser lai tawa ang Mumbai, Pune aser Delhi yimtitem nung aliba Hard Rock Café tem nung la kensep tasenba ‘Suno’ ajungkettsü atema kenten sentong agüja liasü.

You must be logged in to post a comment Login