Kento Momota gari tsükokba lendong nung yiru

Kuala Lumpur, Aenjeti/January 13 (Agencies): Badminton world number one Kento Momota Hombar anepdang züngia lia Malaysia nung gari tsüktepba lendong ka nung densema liasü. Malaysia Masters nung taküm mezüngbuba asayamung akokba sülen ghonda ishika dang lir pa iba lendong nung densema liasü.
Police sangdong ka ajanga ashiba agi, parnok airport-i oya aliba mapang parnok mena aliba van ya lorry ka den tsüktep aser arrshi küm 25 tain Japan nunger asayar teni tsüksa aser pa tejak tesem kar nung rangsaogo.
Gari anisang ya iba tesem nung süadok. Iba lendong nung assistant coach ka, physiotherapist ka aser badminton official ka terara yirua liasü.
Osang agütsüba mapang Fire and rescue department-i ashiba agi, gari anisang tasümang gari nungi magitetteti lir. Momota aser tanga asayartem terara yiru aser parnok ajak Putrajaya Hospital-i temang anepalutsü aoshi yokogo.
Iba lendong ya anepdang 4:40 ako (2040 GMT Sunday) shi nung atalok aser firefighters 10 iba tesemi aritepa ao, ta fire & rescue department official Norazam Khamis-i AFP dang ashi.
Yirur alirtem ajak parnoksasa gari nungi ayazüka alutetogo, ta paisa ashi. Noksa nung parnok mena aliba van tejaklen ajak ajasar aliba angutsü saka tesülen meraksai kanga junga lir.
“Iba ya kanga dang tesasatsü lendong ka lir aser talisa Momota amala kanga dang nüngtugu asayar ka densema liasü,” ta Malaysian sports minister Syed Saddiq-i yirur alirtem mozükidang semdangba sülen osangbenertem dang ashi.
Paisa, yirur alirtem ajak tajungba kümdar aser parnok lendong nungi jenboa lir, ta ashi.
Parnok rongnung kar, tetsüng, teka aser tekolak ta yirua liasü, ta police-i ashi.
Iba lendong atalokba angazüka mepelai bilemba Badminton Association of Malaysia-i lemsatepogo.
Deobarnü Momota-i taoba world champion Viktor Axelsen koka Malaysia Masters asayamung kokogo, koba BWF 2020 World Tour season nung mezüngbuba asayamung lir.
2019 küm Momota kanga takok ngua asayaogo aser pai World Championships, Asia Championships ser All England Open densema asayamung 11 kokteta otsü tasen ka yangluogo.