Kenü nung nisung billion kati Facebook amshi

San Francisco, August 28 (Agencies): August 24 nü nisung billion kati social networking site Facebook amshiba ajanga kenü nung nisung timtibai Facebook amshiba otsü tasen ka yangluogo, ta Facebook nguteter aser CEO Mark Zuckerberg-i metetdaktsü.

“Onok asoshi ibai takok tulu ka lir. Nisung billion kati kenü nung Facebook nung login asübaji tan mezüng lir,” ta Brihostibar nü Mark Zuckerberg-i Facebook nung zülua liasü.

“Hombar nüa alima nung aliba nisung tenet nungi nisung kati Facebook ajanga medemer aser kinüngertem den lemsatepa liasü,” ta pai ashi.

Alima nung social network tulutiba ngutetsangi, iba takok ya ajanga onok dak alima nung aliba nisung ajak internet ajanga sentaktepa kümdaktsütsü nükjidong aliba anaba leni anir aoer, ta ashi.

“Onoki nisung shia nem pei tebilemba lemsateptsü maongka lapoktsür koba ajanga tangatettep aser tanü asüng tensa meteta akümba nung tajangzük angütsür,” ta Zuckerberg-i Facebook nung zülu.

Pai, “Nisung ajaki pei tebilemba marendaki shitetba aser teti sentaktepa aliba ajanga alima tajunba akümer,’ ta ashi.

“Facebook ajanga nai meimertem den tesendaktep tajungba akümer, sen laluba nungi kümzüker aser loktiliba tashi taitba kümdaktsür,” ta pai shisem.

Facebook amshir ajak agi nisung billion 1.5 lir shirnoki ita nung khenbosa Facebook amshir. 2012 küm Facebook amshir nisung billion ka junga aküm.