Kenübo naia New Nagaland nung lidangnür asü?

– Takolong, Ex Candidate, Chuchuyimpang.

Tanü asenok aliba lima aser yangji aliba kechisarna ajak atema tsüngküm (season) ka lir. Raksaba mapang ka, yangluba mapang ka, ola madokba mapang ka, ola adokba mapang ka; anungji tanübo joko ola tulu adokba New Nagaland yanglutsü mapang asenok Naga nunger kishizüng nung nokdaka lir ta iba oset tenzüker. Old Nagaland nung lia arudang asen Naga nunger yimsüsürtemji ken meyipa reprangdangra parnoki tarutsü lanu asensor atema tanü ni ya yimsüsür tajung ka lir ta bilemtsüjibo pungmang, saka parnoki sen aser tashi (Money + Power) dak tenük yoker tanü parnok yimdong zü (street dog) ama market place nung senzüteper aser yamaji parnoki parnok ki (Home) menungra mali , kechiaser parnok ano ki matong, oda Tsüngremi ka parnok den mejmbira kodanga parnoki ki matongtsü. Tashi (power) ji Naga nunger nübor ket nung lir, parnok ket nung mali, sen (Money) rongsenji Naga nunger meyong, parnok meyong masü, saka Old Nagaland nung yimsüsürtemi tenük amur tejak repranga yimsü asüdang asen Naga nunger küm 15 years (fifteen years) tashi mejangdaktsüogo. Tanü Anüng petinui aoba putu ka nung alidang asen Naga nunger million ana küm 15 tashi mejangdaktsügo. Shiba mapa ? Iba mapa ya Old Nagaland nung alir ochi mashi tiyazü jembir yimsüsür telok ka lir.
Kanga dang osang tajung kaji ya, joko Old Nagaland nung yimsüsüba agi kanga dang lakteter aliba mapang ka nung kanga dang shisa akartemi tarutsü Naga lanu asensor nükla nung New Nagaland dak rangloker, oda asen Nagaland danga junglibo ta sür Ao, Sema, Lotha kin asem temeimtep aser telongjem nung ka kümer C.N.T.C tenzüktetogo, aser yamaji ano kin asem kaketshirtem longjemogo, ya angudang tenük nungi nüktsü alua kodangang nia New Nagaland nung lidangtsü ta sarasadema yongyaseta atar. Tanü iba ama temeimtep aser telongjem mapa tajung ya sen agi alitsü makokba osang tajung rongnung ka asütsü. kong temeimtep aser telongjem lir, yangji yimjung, tashi, takokba aser teyanglushiba lir, anungji asenok ajaki New Nagaland yanglunüra, aser yangji kenü danga linüra talisa asenok kin asem temeim aser temulongjang ka sür teka amteper joko Old Nagaland nung alidang teyazü jembia yimsü asüba ama masü joko asentenshir rongsen aser tashi dak tenük meyoki, ali nung naro ama taküm tatsüka alidang ochishia oda rongsen aser tashiji M.L.A & Minister meyong masü ta angateta inyaktsütsü molunga lira tarutsü New Nagalandji kin asemi meyanglura ano shir dak imlar ? Iba oset ya shinga kin anema ola adoker masü, saka lia arudang timtem aika ajuruba agi maremtet nung iba oset ya lemsateper. Anungji tangashir ajaki amajok nung mapang meindoki memejangi aritepa tarutsü lanu asensor atema inyaktsüdi arung ta tayongzükba ola ka ayimoktsür.
Kuknalim