Kenüyongi AAP MLA ana apubaji jashiba temaitsü lir: Sisodia

New Delhi, July 25 (Agencies): AAP MLA ana apuba dak sentakba nung tanü AAP-i Ato kilonser, Narendra Modi aija, ibaji pa jashiba temaitsü lir, ta ashi.
Kenüyongi AAP MLA ana apuba dak sentakba nung party tongti aser Delhi Chief Minister, Arvind Kejriwal-i, “Yazü ken otem nung Modi-i Delhi nüburtem tepoukdaki yoker,” ta ashi. Ken o balala nung AAP MLA 11 puogo.
Kejriwal-i, kechiba Ato kilonseri tetsürtem kümzüktsü melena police ajak nem tanga yimtenren party tem anema inyakdaktsür, ta asüngdang.
Kejriwal-i twitter ajanga, “Kechiba Modi-i tetsürtem anema inyakertem mapur ? Modi-i tetsürtem kümzüktsü melena police ajak yimtenren nung pa anemer party tem anema inyakdaktsüba ya taaktsüka lir,” ta ashi.
Delhi Deputy Chief minister, Manish Sisodia-ia, “Kenüyongi MLA ana apubaji ajanga pa (Modi) jashiba temaitsü sayur,” ta ashi.
AAP lenir, Ashutosh-i ashiba agi, Khan slipper asemtsüa memela aser police-i CCTV camera ajak tsüngbanglen dang tuyu, ta aitsü.
Paisa, AAP kanga nüngtugu akumba ajanga BJP tsübur, ta ashi.
“Amanatullah apudang pa slipper asemtsüa memela aser police-i CCTV camera ajakji tsüngbanglen tuyu. Iba ya Modi’er ozüng lir. Pai ozüng aser kulitem mezüngshir. Nüburtemi reprangdar. AAP nüngtugu akumba ajanga Modi tsübudaktsüogo,” ta Ashutosh-i twitter ajanga ashi.
Yashi osangbenertem senden nung Khan-i, Jamia Nagar Police station SHO-i tetsürla dangji iba ken o nung Khan tenüng tetshitsü tuyu ta aitsüba den külemi iba kuli agüja video ka sayaa liasü.
Paisa, tetsürlaji BJP lenirtem den tongtepratepa liasü, ta ashi.
Gujarat nung Patidar nunger apuba den Delhi medemdanga Kejriwal-i, “Gujarat nung Anandiben (Chief minister)-i yazü ken otem nung Dalit aser Patidar nunger tepoukdaki yoker. Delhi nung yazü ken otem nung Modi-i Delhi nüburtem tepoukdaki yoker. Tanbo Delhi aser Gujarat nati longjemer iba anema raratsü,” ta jembia liasü.