Kenüyongi Odisha nung aluyimer 5 soseta asü

Bhubaneshwar, October 27 (Agencies): Odisha chief minister, Naveen Patnaik-i state nung aluyimertem dang, parnok khuret aser tebilemtsü atema akokba tashi teyari agütsütsü, anungji nenok shisa tebulo, ta ashiba sülen anogo ka lir tanü state nung  aluyimer pongu tashi soseta süogo.

Tesüiba ita ana tsüngda aluyimba nung takoksa tulu ajurua sentsüh ajanga soseta asür aluyimer 38 jungogo.

Hombar nü Bargah district kübok Sirabhal yimtsüng nungi nisung ka tenüng agi Pabitra Bariha district headquarters hospital nung asü. Deobar aonung pai miim ajemba sülen mozükidangi anir oa liasü. Tzünglu junga maruba ajanga alu nung takoksa tulu ngua liasü aser par kibongi nija sen aputsürtem dang nungi sen 50,000 apuba densema sen lakh 1.5 apua liasü, ta par kinüngertemi ashi.

Ano Ganjam district kübok Birasinghpur nunga aluyimer ka tenüng agi M Bidyadhar Patra, soseta süogo. Pai tangar den tenangzüktep agia tangar lu nung alu yima liasü, ajisüaka tzünglu peria maruba ajanga takoksa tulu ajuru.

Maneni Dhenkanal district kübok Sankulei yimtsüng nung alir ka tenüng agi Baidhar Pradhan-i miim ajemba sülen Cuttack nung aliba SCB Medical College & Hospital-i anir ao saka mekümzükteti süogo.

Ano Sundarpur nung nisung ka tenüng agi Bayadhar Mahalik (55)-a miim ajemba sülen süogo. Par kinüngertemi ashiba agi, pa indang alu acre ka liasü aser tangar indang acre pongu nung alu ayim. Iba dak alia pai cooperative society ka dang nungi sen 50,000 apua liasü.

Keonjhar jila kübok Tkiarpada yimtsüng nunga Satrughna Behera (45)-i miim ajemba sülen süogo. Iba tatalokba sülen aluyimertemi lungkak aita national highway 215 nokdangba den külemi asür kinüngertem nem senotsü teyari agüjang ta khangogo.

Satrughna-i kinüngtsü den jala ana aser jabaso ka toktsür süogo. Item tatalokba nung ajemdaker opposition party- BJP aser Congress-i, sorkari aluyimertem atema nendaka meinyaker, ta aitsüogo.