Kenya nung al-Shabaab-i ‘Non-Muslim’ tebur 9 tekolak atang

Nairobi, July 11 (Agencies): Africa nung kiralongrar telok Al-Shabaab-i Kenya yimtsüng ka nung Muslim nunger masürtem bushidang nisung 9 tekolak atang.
Al-Shabab kiralongrar 15 shi kati Jima yim nung nisung 9 apu aser tepset.
“Parnokji an tepseter ama kotari agi nisungtemji tepset. 2014 nung Mpeketoni nung atalokba den kasa liasü. Ano tasümang aika monguteti alitsü ama onoki bilemer” ta police-i metetdaktsü.
Iba tesem nung Al-Shabaab-i “non-Muslims” bushi aser iba osang angashia nisung aika tesem toktsür jena ao. Kenyan Red Cross-ia nisungtem jena aoba nung yaritepa liasü.
Al-Shabaab jagi non-Muslim teburtem dang bushir ta idakji alir Kaingu Kadzomba-i ashi.
Somali nung amenoka aliba kiralongrar telok Al-Shabaab-i tekolak atangba mapa kanga bulua inyaker. Parnoki Kenya nung tesem aika makogo aser nisung aika tepsetogo.
Tawa tu parnoki Lamu aser Mandera tesemtem nung bomb amshia amakdang nisung 50 jungnüa tepset.
Taküm May ita Kenya nung kiralongrartemi elementary school nung Khristan tesayur ka khaset.
“al-Shabaab kiralongrartem ta temulung melemi bilemertemji school compound telungi ai aser tesayurji class nung lia khaset” ta Somali Muslim tesayur kati ashi.
Parnokisa tanga Khristan tesayur ka khasettsü merang saka Muslim tesayur kati parnok nokdang. Ajisüaka, kiralongrartemi tenaprong pur ao.
Taküm ita Africa Center for Strategic Studies-i Africa nung kiralongrar telok tamajungtibaji al-Shabaab lir ta osang metetdaktsüogo. 2016 küm tsüngda parnoki nisung 4,000 shi tepsetogo.