Kenya nung nisung asem tekolak tangzüka yok

Lamu, August 18 (Agencies): Somalia nung aliba al-Shabab telok südi, ta temolung malemba nisung telok kati Kenya nung aliba yimtsüng ka nungi nisung asem tekolak tangzüka yok.
“Parnok shiruru ama tepsetogo. Parnok temang nungi parnok indang tekolak lepzüka yok,” ta police kati osangbener dang ashi.
Kenya indang tzüküm nung aliba Lamu tesem nung Maleli yimtsüng ka nungi nisung tasümang pezü ngutet, ta police temi ashi.
“Prangbong bena alir nisung telok kati iba yimtsüng amak aser nisung asem tepset. Parnok ajak ya tebur dang lir aser parnok ya tepseta yutsür ki ka nung mi senoktsü aser jena ao,” ta iba tesem nung commissioner Gilbert Kitiyo-i ashi.
“Iba lendong agütsür ya shirnokar ashitsü makok, saka tamalen lendong agütsüba yimya den medemdangra, parnok ya al-Shabab telok nungi amai lir,” ta Kitiyo-i ashi.
Iba tesem nung mangatettep kar aliba ajanga parnok ya tepset südi, ta coastal police tekolakba, Larry Kieng-i ashi.
“Iba lendong nung nisung asürtem ya parnok pezü lir aser iba ya aluyimer aser shiruru metsür tsüngta mangatettep adokba südi,” ta Kieng-i ashi. Iba keno o dak sendakba nung nisung asem pua lir, ta police tanishir-isa shisem.
July nunga al-Shabab telok nungi südi, ta temolung malemba telok kati Maleli yimtsüng anasa nisung 9 tekolak tangzüka yok aser kasa tesem nung police ketdangser asem tepset.
Al-Qaeda den sendaktepa aliba al-Shabab telok ajanga Somalia nung United Nations-i yariba sorkar atsüngdoktsü meranger aser Islam nungi meyipzükba yimsü amangdaktsütsü meranger. 2011 küm Kenya nungi Somalia-i mitkartem yokba sülen iba linük nung lendong tali adoka arur.
Iba linük nung arrtsü alema arua lendong balala agütsüba mapa ya al-Shabab teloki tenüng agia lir.