Kenya nung tanur million 9 nem polio agütsütsü

Nairobi, April 10 (Agencies) : Kenya sorkari anogo pongunü atema linük nung ‘polio vaccination campaign’ ka tenzükogo aser iba mapang parnoki tanur arishi küm pongu teküpok pur parnok nisung million 9 nem iba vaccine agütsütsü nükjidong lir.
Iba sentong ya Health Cabinet Secretary Cleopa Mailu-i Honibarnü Narok jila nung lapoktsü. Sentong lapoktsüba mapang pai, iba polio agütsüba sentong nung linük 47 nung agitsü. Iba sentong ajanga Kenya nung aliba tanurtem polio tashidak nungi kümzüktsü aser ibaji ajanga lokti rangben tajangzük angutsü, ta ashiba Xinhua news agency ajanga metetdaktsü.
Mailu-i, 2014 küm iba sentong ajanga noklang nung shilem 56, 2015 küm shilem 66 aser tan shilem 76 ayimbanga inyaker, ta ashi.
“Linük-i tang tashi nung polio sentong 18 tashi kanga takok ngua agia aruogo, ta pai ashi.
Tan polio vaccination tasenba ya March ita tesem 13 nung polio agütsür alirtem atema follow up inyakyim ka mesüka lir.
“Item vaccine ya National Quality Control Laboratory nung tendangogo aser parnoki iba mozü ajanga timtem kecha magütsütsü ta shiogo,” ta Mailu-isa ashi.
World Health Organization (WHO)-i ashiba agi, 2014 küm polio tashidak agi shiranger nisung 359 puteta liasü, ajisüaka 2015 nungbo nisung 74 dang putetba ajanga temelenshi anguba jangjar.
Kenya-i 2018 tashi nung linük nungi polio tebilemtsü samadaktsütsü ta WHO den sign sütepa lir.