Kenyongi taküm tasen : J. Adok 22: 1-16

 “Khrista shibai ni tashi itdaktsür Pa ajanga ni ajak inyaktsü akok.” (Fil. 4:13).
Meimchir temeshi melitetba tatemzükba kulitem asenok shisadanga aruogo, tatemsa idaki tatemzükba kuli ana indang shisadangdi.
1. Temeshi Yimyaliro (temperamental)
“Ni meyaritet; ibai kü yimya!” Iba O  teti angashir, shidak aser tai ? Atangji, asenok Yimyaliro balala lir – kar yimya agi anükalemer, kar teküprak aso; kar shi-azüapung tali, kar yimya dak tajemba; aser yamaji (over sexed, under sexed). Saka kodang asenok tanaben sodir, asenok tasen akümer; tejenba ajak endoker, asenok tasen akümer; (2 Kor. 5:17). Iba tetezü asenok temulungjang nung temenen tashi-i atsüshiba koktettsü asoshi Tanela Temeshi ajanga Tsüngrem metsü aremba (1 Yn. 3:9). Tasen Tezüngzüktepbaji asenok temulungjang lung ama temerang aliba temulungjang tanük agi melentsüba lir (Ezek. 36:26). Iba tetezü asenoki joko temenen menatsü makok ta mangatettsüla. Saka, asenoki temenen madak takok angutsü asoshi Tsüngremi taochi agütsütsü (Rom 6:14). Nai Yakta ain adoktsü akok saka nai aji süngzüktsü akok! (Ef. 4:26). Na tenetben alangaka kodanga tetoktsü. Tsüngremi asenok dang nangzükbatem teti khangang aser iba nung azüitang (2 Peter 1:3, 4).
2. Temeshibaji Arogo puturen
Tejen Lai ozüng nungi asen Lai taochi kübok nüji kümdaktsübaji temenen menatsü asoshi temelaba agütsüba lir ta aibilena mangatettsüla (Rom 6:1, 2). Tejen Lai nung Tsüngremi kechi khanga (demand) liasü aji Tasen Lai nung makhanger ta bilembaji tamachi tebilemba lir. Shidakba nung Tasen Lai nung temeshiba jenjangji (standard) temaba ajungkettsü. Tetsür dak azü ajunga reprangba tang nüktapangtaba den saku ta züngshir, aser kuli makai ain adokbaji tepsetba den kasa (Mt. 5:21, 22, 23, 27, 28). Aikati temeshibaji tarutsü atema ta bilemer, kodang Yisu tanaben arudir idangji temeshi akümtsü, saka tamakok angur, tang aliba taküm meshia melitetter aser Tsüngrem metsübur (2 Kor. 7:1). Khristai asenok tatemsa ajabaji, “Shiba ochishir, pai ano ochishiba inyakang; aser shiba temeshi lir, pa ano temeshi kümdakjang. Ajiang, Ni yakta arur, nisung shia pa mapa amato tajangzük agütsütsü aji kü den lir.” (J. Adok 22:11, 12).
Meruktettsü asoshi na Yisu dangi odanger asü? San Chanu zü nung shitokoko ma? Temenen ar aketba süoshi entokang aser San Chanu zü nung shitokang! (Rev. E. A. Hoffman).