Kerala Assembly election atema PM Modi-i nübo yimtsü

Thiruvananthapuram, May 08 (Agencies): Kerala Assembly elections atema Deobarnü Ato kilonser, Narendra Modi-i Kasarkod district nung BJP atema nübo yimtsüogo.
Tanü Modi-i, UDF aser LDF nati nüburten mezüngmeshiogo, ta ashi.
“Tang Kerala nung yimtenren tasen ka tenzükogo. Ibaji yimtenren asetshiba, ochimashi yimtenren aser kati ka kümzüktsü atema tezüngzüktep agiba yimtenren lir,” ta pai ashi.
“Iba ya UDF aser LDF na tsüngda contract yimsüsüba lir. Küm pongu nenoki yimsü süang aser küm pongu onoki yimsü südi ta tezüngzüktep agiba lir. Ibajia ajanga Front anai maneni state yimsüsür,” ta paisa ashi.
May 16 nü agitsü aliba Kerala assembly election atema nüboyimja jembidang Modi-i, Bengal nung Congress aser CPI(M) na loktepba aija jembi.
“Kerala nung Congress lenirtemi state nung CPI(M) züngsemtemi rara adokdaktsüba indang jembir, saka parnok kodang West Bengal-i odir parnoki CPI(M)-i dang West Bengal kümzüka yutettsü ta jembir”, ta ashi.
“Iba election ya shirnoki Kerala nung sorkar akumtsü ta asübaji tongtibang masü, saka shirnoki Kerala kümzüktsü aser Kerala lanurtem nem mapa agüja tarutsü tia yanglutsütsü ta asüba election lir,” ta Modi-i ashi.
BJP-NDA candidate tem nem vote agüjang ta mepishia, Modi-i tesüiba küm ana tsüngda Centre sorkari terenlok aser welfare scheme balala tenzükba indang metetdaktsü.
Pai anogo pezü tsüngda senden pongu nung party atema nübo yimja jembitsü.
Osang ajanga angazükba agi, Ato kilonser, Modi-i maneni May 8 nungi 11 nü tashi state nung nübo yimtsütsü.
Ato kilonser Modi dak alia Union Home Minister Rajnath Singh-ia tanü nungi tenzüka  state anogo ananü semdanga lir.
Tamalen BJP Tir,  Amit Shah-ia Kerala district aika nung nübo yimtsüogo.