Kerala CM anema FIR benoktsü court-i tuyu

New Delhi, January 28 (Agencies): Solar scam ken o nung Brihostibarnü vigilance court kati Kerala chief minister, Oommen Chandy aser power minister, Arayadan Mohammed na anema FIR benoktsü tuyuogo.

Nisung ka tenüng agi PD Joseph-i ken o ka agütsüba nung ajemdaker Thrissur Inquiry commissioner aser special judge, SS Vassan-i CM aser minister anema FIR benoktsü aser tekaratiba nung bushisüngdangtsü tuyu.

Solar ochimashi ken o nung tongti aibelener, Saritha S Nair-i jembiba o nung ajemdaker ken o agütsüsang Joseph-i Justice Sivarajan commission nem iba ken o ji agütsü.

Saritha-i, lai chief minister den inyaksang nem süpokrem sen crore 1.90 shi agütsü aser power minister nem süpokrem lakh 40 agütsü, ta ashi.

Iba dak sentakba nung Brihostibarnü osangbenertem dang chief minister Chandy-i, “Iba ya tasa tamajung yangluba ka lir, aser iba nung ya yi ayoker kibur kar densema lir. Parnoki onok dang jashir, kechiyong onok indang ‘liquor policy’ Supreme Court-i agizükogo. Iba ta tasa tamajung ka lir. Iba sorkar tanaben tashii arutsüa akok ta jembiba oji CPI-M-i amangba ajanga yamai inyaker,” ta ashi.

“Iba ya tesüngmangtsüka, kechiyong taoba hopta tashi lai (Sarutha) ni ya tebu ka ama ta jembi, aser tang ajungbena lai tai tongloktsür. Tai tongloktsüba nungji ochi tera kata mali,” ta chief minister-isa ashi.

CM aser minister nem tai tongloktsüba jungkai adokba mapang nungi CPI-M-i aniba Left opposition-i chief minister menden nungi alutsü akhanger.