Kerala-i olulu masü teyari nüngdaker

Kerala nung tzümetsüng lendong tulu ajurua kodamasüba mapang ka nung ketdangsertem aser civil society temi timtemer yaritsü atema tebilemtsü bena mapa inyakba dang masü saka taila osang, olulu aser asaa taitsü aketba osangtem prokshiba azüoktsü atema khuret tuluba ka ajurua lir. Küm 123 tejen Mullaperiyar tzünoktang pokdangtsü aser district aika metsüngbangtsü ta olulu ka prokshiba ajanga nübortem kanga aoksatep saka Deobarnü Chief Minister Pinarayi Vijayan-i Twitter nung iba osang tiyazü ta jangjatsüba sülen ang nübortem temulung süngjema aküm. Ano yakonung, Indian Army-ia ‘nisung kati Army uniform sübor video message ka ajanga osang tiyazü prokshir’ ta metetdaktsü. Chief minister-i Indian Army nem rescue maparen bendanga magütsür ta video nung nisung jagi ashir. Iba video ya WhatsApp aser Facebook ama social media sabangtem nung kanga bulua belenshir aser nisung aikati osang dak amanger. Ano, audio clip ka nung nisung kati Kerala tzümetsüng ajanga kongshirtem teimba kibong tajungtem dang, takartem lir ta shia lir. Iba nisung yagisa Chief Minister’s Disaster Relief Fund indang senotsü amshiba nung temulung malemba aser Kerala tzümetsüng atema masü saka Seva Bharathi ama teloktem nem ang tenla agüjang ta shia lir. Maneni, state ajungalen electricity mangutsü, Navy rescue helicopter indang phone number aser Onam benjung mamungtsü ta tiyazü osangtem prokshiba ajanga nisung aika ratadaktsür aser temulung mesüngjemteter. Tebilemba tamajung nung osang tiyazü belenshiba rongnung kaji arogotemi Khristantem dang yarir ta ashiba osang lir. Ajisüaka, asangsang nungbo Khristan arogotem, Hindu tekülem kitem aser madrasa temi tejak mereprangi timtemertem kanga yaria arudar. Social media nung tang kanga bulua belenshiba osang kaji, football asayar mongin Cristiano Ronaldo-i Kerala nem sen crore 77 tenlatsü ta asüba olulu lir. Anogo ishika tejaklen English football club Liverpool aser Spanish club Barcelona teloktemi timtemertem yaritsü atema osang metetdaktsüba sülen tang Ronaldo indang tiyazü osang belenshir. Yamaji olulutem prokshiaka, Kerala nung alirtemi kasa sabangtem ajanga teyaritep mapa tapu aika inyakdar. Parnoki osettsüset aser chiyungtsü aliba/maliba aser tzü agi meketbanger taolen maliba nisungtem aliba tesemtem indang osang tejangja prokshir. Saka, olulutem ajanga rescue maparen nung tetsükdaktsü bentsür arur aser iba ajanga nisung takümtem lendongbang nung yutsür. Sorkar aser ketdangsertemi olulu prokshirtem azüoktsü aser iba inyakyim noktangtsü atema mapa tesashi inyaktsüla. Ano, nübortemi tiyazü aser olulu osangtem nung tenük amor mamangtsüla aser official sources nung aruba osangtem dak ang temulung alemtsüla. Tang ya WhatsApp aser social media kanga tongtipang lir anungji oulutem prokshiba ajanga Kerala nem funds, relief materials aser volunteers agütsüba nung timtem magütsütsüla kechiyong tang Kerala-i olulutem masü teyari tulu nüngdaker.