Kerala: Nisung lakh 6 dak tema relief camps nung jenoka lir; UAE nung India nunger shishilembartemi sen million 125 tenlar

New Delhi/Dubai, Luroi (August) 19 (Agencies): Kerala nung tzümetsüng tesemtem nungi nisung 38,000 dak tema kümzüka anienogo ta Centre-i Deobarnü metetdaktsü.
Nisung 23,000 dak tema nem medical aid agütsüogo aser Food Processing Ministry-i food packets 3,00,000 tashi bener yokogo, ta Centre sorkar sangdong ka nung ashi.
National Disaster Management Authority (NDMA)-ia ashiba agi, nisung lakh 6.33 dak tema relief camp 3,000 shi ka nung jenoka lir.
Külen, India Metereological Department (IMD)-i tanü Kerala nung taruba anogo 5 tashi tzünglu marutsü ta osang metetdaktsü.
Iba ya Kerala nung alirtem atema osang tajung lir aser nisung aika nem teimla agütsür. Taoba hopta ana tashi tzünglu tanen makai aruba sülen tanü state kübok tesem teimba ka nung tzünglu maru aser district aika nungi ‘red alert’ agienogo.
Tanü-a nisung 13 tashi taküm sama aser taoba anogo 10 tsüngda lendong balala nung tasür ajak agi 210 liasü.
Tzümetsüng agi lungbanger aliba nisung teimbaka kümzükogo aser tang parnok rehabilitation atema temulung agütsütsü ta Kerala Chief Minister Pinarayi Vijayan-ia metetdaktsü.
Petroleum and Natural Gas Ministry-i Kerala nem kerosene kilolitres 9,300 tashi agütsüogoi aser ano kilolitres 12,000 lemzüktsütsü. Kochi nung aliba LPG bottling plant-a lapokogo.
Department of Food and Public Distribution-i jangotsü 50,000 million tonnes (MT) agütüogo aser Department of Consumer Affairs-ia Hombarnü pulses 100 metric tones tashi tayimtsü ajanga bener aotsü sentong lir.
Centre sorkari tasür kibong shia nem sen lakh 2 aser yirur shia nem sen 50,000 agütsütsü telemtetba agiogo. Senji Prime Minister’s Relief Fund nungi agütsütsü.
UAE nung India nunger billionaire shishilembartemi Kerala nung tzümetsüng ajanga timtem bentsür aruba nung yariteptsü atema sen million 125 tenla agütsütsü ta metetdaktsüogo.
Kerala nung asoba businessman aser Lulu Group nung chairman & managing director Yusuff Ali MA-i sen million 50 agütsütsü metetdaktsüogo, ta tanü Khaleej Times ajanga ashi.
Ano, Fathima Healthcare Group chairman KP Hussain-ia sen million 50 tenlaogo. Pai ashiba agi sen million 50 nungi million 10 ji Kerala Chief Minister’s relief fund dangi indangindanga aotsü aser tanüngbaji medical relief aid nem agütsütsü, ta Khaleej Times nungsa metetdaktsü.
Hussain-isa ashiba agi par teloki volunteers yoktsü atema Kerala state health secretary den jembitepogo.
Kerala nem tenla agütsütsü ta nangzükba tanüngba UAE nung amenoka aliba businessmen temji, India-born billionaire aser Unimoni & UAE Exchange chairman BR Shetty (million 20) aser Indian physician & philanthropist Azad Moopen (million 5) na lir.
Yashi United Arab Emirates prime minister aser Dubai yimsüsür Sheikh Mohammed bin Rashid Al Maktoum nati Kerala yaritsü atema osang metetdaktsü aser tenati emergency committee tentettsü tetuyuba agütsü.
UAE nung India nunger million 2.6 shi ka lir aser nütsüng yongsük nung parnok shilem 30 shi lir.