Kerala nung azü tepsetba atema gold coins agütsütsü

Thiruvananthapuram, October 30 (Agencies): December 10 nü tashi nung Kerala nung kibur maliba azü timtiba tepsettetba ketdangsertem nem gold coins agütsütsü, ta nüngtugu college ka nung tamalen azünger tentet kati sangdongogo.
Tesüiba ita pezü tsüngda Kerala nung azü agi angoba ajanga nisung pezü süogo aser 700 dak tema yirutsüogo.
State nung kibur maliba azü tebilemtsü atema Pala nung aliba St Thomas College nung tamalen azünger Old Students Welfare Association ketdangpurtemi, state tesem koba nung azü timtiba tepsettetdir parnoki item Panchayats aser municipalities nem sempet agütsütsü, ta sangdongogo.
Azü tamajungtem azüoktsü atema tawa parnoki jenjang dalang agi air guns agüja liasü.
Tamalena state nung aliba Industrialist temi azü tepsetba atema senotsü sempet agüja liasü.
“State nung azü timtiba tepsetba atema panchayat Tirtem aser municipality chairmen nem sempet agütsütsü onok sentong lir. Onok nükjidongji nüburtem azü nungi kümzüka alitsü asoshi lir,” ta Association General Secretary, James Pambaykkal-i ashi.
Kibur maliba nemzüba azütem tebilemtsü atema state sorkari kecha meinyakba atema  aija pai, nüburtem nem shilem agidakja iba tebilemtsü atema inyaktsü aser tentet züngsem 200 aser temulungertem nungi aruba tenla agi gold coins alitsü, ta paisa metetdaktsü.
October 26, 2016 nü Varkala jila nung azü telok kati arishi küm 90 tambur ka tenüng agi Raghavan ngusetba sülen iba tebilemtsü atema asentenshiogo.
Sorkar data ajanga sayuba agi, taoba ita pezü tsüngda state nung kibur maliba azütemi nisung pezü ngusetogo aser tanur 171 densema nisung 701 yirutsüogo.
Taküm küm tang tashi nung state nung azü agi angoba atema sorkar hospital balala nung nisung 53,000 dak tema anepaluogo.