Kerala nung election nüboyim tenzükogo

Thiruvananthapuram, April 15 (Agencies): Tawa Kerala, Kollam district nung aliba tekülem kidang lendong tulu atalokba sülen state nung May 16 nü assembly election atema election nüboyim sentong junga tenzükogo.
April 10 nü Kollam nung lendong tulu atalokba ajanga state yimtiba, Thiruvananthapuram aser Kollam nung election nüboyim anena liasü. Ajisüaka ano maneni nüboyim sentong asentenshia tenzükogo.
Kerala Chief Minister, Oommen Chandy-i taruba anogo asem tashi nüboyim sentong yangluogo.
State nung Congress-i aniba UDF nüboyim sentongji chief minister leniba nung agitsü, iba den külemi KPCC Tir, V M Sudheeran aser Home Minister Ramesh Chennithala natia kobi melii election nüboyim balala nung jembitsü.
Chandy-i April 16 nü Ernakulam aser Palakkad nung jembitsü aser April 17 nü pa aliba constituency, Puthuppally (Kottayam) aser Alappuzha na nung jembitsü.
Ano CPI(M) lenir tain arishi küm 93, V S Achuthanandan leniba nung party-i aniba LDF nüboyimtsü, aser tan ita tatemlen tashi pai north district tem sema nüboyima senzütsü.
Achuthanandan-i April 25 nü pa adokba constituency, Malampuzha nung election nung tokteptsü atema tenüng agütsütsü.