Kerala nung helmet masemer dang petrol mayoktsü

Thiruvananthapuram (Kerala), June 29 (Agencies): Kerala nung tetsüng ana aketba garitem (two-wheelers) anishirtem lendong kanga bulua atalokba atema khuret bena Kerala sorkari Bodhbarnü August 1 nü nungi helmet masemer dang petrol mayoktsü, ta osang metetdaktsüogo.
“Helmet mesemi two-wheeler anir nem totzü ayokdak petrol mayoktsü aser iba dak sendakba osang ya oil company aser petrol pump kiburtem dang sangoktsüogo,” ta Transport Commissioner, Tomin J Thachankary-i metetdaktsü.
August 1, 2016 nungi Thiruvananthapuram, Ernakulam aser Kozhikode nung iba ozüng ya tenzüktsü aser tanüngba district tem nunga benoktsü, ta pai ashi.
Pai totzü company tem, dealers aser pump kiburtem den iba onük lemsatep aser parnokia helmet mesemi two-wheeler anir dang totzü mayoktsü mulunga agizükogo, ta Thachankary-isa shisem.
Kerala nung gari lendong nung asür nisung noklang nung tesadang kaji motorcycle anirtem lir aser tasür noklang nung shilem 80 ji tekolak yiruba ajanga asür, ta sorkar sangdong ka nungsa metetdaktsü.
2015 küm Kerala nung gari lendong 14,482 atalok aser item lendong nung nisung 1,330 asü, ta sorkarisa ashi.