Kerala nung ISIS den sendakteper lanur 3 apu

Thiruvananthanpuram, October 25 (Agencies): Ita pezü tejakdang Kerala nungi nisung asem Syria-i aotsü aliba nokdangba sülen tanü parnok ISIS telok den tesentaktep aliba atema tai tonglokja apu.
Par asempronglaji arishi küm 20 tema lir aser parnok ita pezü tejaklen Turkey nungi aruba sülen police-i mita repranga aru. Ita pezü tejakdang par asemji Syria-i aotsüba liasü saka parnok linüki meyipa yok.
Taoba ita ishika police-i Mithilaj KC (26), Abdul Razak KV (24), aser Rasheed MV (27) nungertem mita aru.
“Onoki item lanurtem mapang tatsüka repranga aru” ta Kannur district nung senior police officer, PP Sadanandan-i osangbener dang ashi.
“Parnok ISIS den sendaktepa aliba website tem nung kanga teyakyak liasü aser training agia liasü. Onoki parnok dak sendakba osang tejangja bushitepdar” ta Sadanandan-isa ashi.
Parnok komaser züngsem aküm, tesayuba angazük aser senotsü teyari angu ta asüba onüktem bushisüngdang südar, ta paisa shisem.
Par asemji Unlawful Activities (Prevention) Act kübok tai tongloktsüogo aser parnok aibelenba putetra, küm 10 tashi tepuokdak ayutsü akok.
India nunger 100 shi Syria, Iraq aser tangalen ISIS atema raratsü atema ogo ta osang buhiteta lir aser parnok teimbaka Kerala state nung lir. Iba jagi Kerala nung Islam talila bilemloka oa amangba tera ayanger ama khuret süa bilemer.
National Investigation Agency(NIA)-i nisungtem samaba ken o tem bushisüngdang südar aser tang parnoki nisung 21 shi ISIS nung dener alitsü akok ta temulung melemi bilemba osang metetdaktsüogo.
Parnok rongnung 17 ji Kasaragod aser Palakkad nungi pezü lir aser tetsür pezü den tanur asem densema lir, ta NIA-isa ashi.