Kerala nung mezüngbuba Metro, Kochi rail service tenzükogo

Kochi, June 17, 2017: Honibarnü Kochi nung Ato kilonser, Narendra Modi-i Kerala nung mezüngbuba Metro rail tenzüktsüba sülen iba Metro nung mener aoba noksa nung angur. Kasa noksa nungsa Kerala Chief Minister, Pinarayi Vijayan aser ‘Metro Man’ E Sreedharan nata angur.

Kochi (Kerala) June 17 (Agencies): Honibarnü Ato kilonser, Narendra Modi-i Kochi nung Kerala state nung tang mezüngbuba Metro rail lapoktsü aser state Chief Minister, Pinarayi Vijayan aser ‘Metro Man’ E Sreedharan na densema tongti ketdangsertem den train nung mena liasü.
Ato kilonser Modi den Union Minister Venkaiah Naidu, Kerala Angh, P Sathasivam, Kerala BJP tongti lenir, Kummanam Rajashekaran, Union Urban Development Secretary, Rajiv Gouba, Kerala Chief Secretary Nalini Netto aser BJP state Tir, Kummanam Rajasekharan nungera Ato kilonser den train nungji mena liasü.
Iba sentong nung Kerala CM Vijayan-i Kochi Metro yangluba nung shilem agir ajak dang pelaba metetdaktsü. Ato kilonser Narendra Modi dang pelaba lemsatepdang CM, Vijayan-i, “Mangdang ka aliba tangbo atangji nung atalokogo,” ta metetdaktsü.
Tanep Modi-i Palarivattom station nung iba Metro tenzüktsüba sülen pai Palarivattom nung aliba station nungi Pathadippalam nung aliba station tashi train nung mena liasü.
Kochi Metro rail tenzüktsüba sentong nung jembidang Ato kilonseri, nüburtem dak rangloker yimti/jilatem nung temelenshi bener arutsü nüngdak, ta metetdaktsü.
Paisa, Kochi Metro Rail System nung inyaktsü atema tetsür 1000 den ‘enoch’ 23 shimokbaji mapa tajung ka lir, ta ashi.
Ato kilonserisa, 2016 küm January ita nung Kochi ya Smart City shima liasü, aser ibaji ajanga tarutsü nung ano tajungba inyaktettsü imlar, ta ashi.
“Mapang ka nungbo Arabian tzüyim chubatsür ta ajaba, Kochi ya ‘spices’ shishilembaba tiyongtsü ka liasü, saka tangbo iba yimti ya Kerala nung shishilembaba tiyongtsü ka ama züngshir,” ta Ato kilonserisa ashi.
Kochi Metro Rail Limited (KMRL) yanglutsü atema Centre-i senotsü shilem 50 aser state-i shilem 50 indoka liasü.
Iba project atema tang tashi nung Centre-i sen crore 2,000 dak tema agütsüogo.
Iba project atema 2012 küm September 13 nü taoba Ato kilonser, Manmohan Singh-i lung azüngja liasü aser state nung Congress sorkar yimsüsüba mapang, 2013 küm June ita nung iba project tenzüka liasü. Ajisüaka tanü taoba Chief Minister aser Congress lenir, Oommen Chandy bo iba sentong nung maden.
Kochi Metro yangluba nung sen ajak agi crore 5,181.79 shi indokogo.