Kerala nung tzümetsüng lendong mesüngjemer; asür 164 jungogo

Kerala, Luroi/August 17, 2018: Kerala nung Indian Navy nungi sepaitemi helicopter amshia tzümetsüng aliba tesem ka nungi nisungtem kümzükba noksa nung angur.

Chennai (Tamil Nadu), Luroi/August 17 (Agencies): Kerala nung anogo aika tzünglu aruba ajanga Luroi/August 8 nungi tenzüka tanü tashi nung tzümetsüng aser iba dak sendakba lendong balala nung nisung 164 süogo aser kibong 52,856 nungi nisung 223,000 shi relief camps nung jenoka lir.
Tanü State Chief Minister, Pinarayi Vijayan-i, iba tensa ano mejungi lir aser district pezü nung nisung meyirjang aika pei kidang nungi mayazükteter, kechiyong tzü metsüngba mesüngjemer, ta metetdaktsü.
Tanep osangbenertem den jembidang Vijayan-i, “Tensa maneni mejungi lir. Tesem kar nungbo tzünglu aruba anenogo, ajisüaka tesem aika nung tzünglu sashia arur,” ta metetdaktsü.
Pai ashiba agi, tanep pai Ato kilonser, Narendra Modi aser Defence Minister, Nirmala Sitharaman na den jembiogo aser Centre-i akokba tashi yaridar.
Ato kilonseri state tensa asadangtsü atema semdangtsü, ta osang angazüker.
Kerala kübok district pezü- Pathanamthitta, Alappuzha, Ernakulam aser Thrissur nung tang tashi tzü metsüngbanga lir, aser nisung meyirjang aika pei kidang nungi madokteti lir. Parnok ajak tanga tesemi belentsü atema sentong yangludar aser tang parnok nem chiyungtsü aser tzü tajemtsü belena agutsüdar.
Tang state nung relief camp 1,568 lapoka lir, aser idakji nisung meyirjang aika jenoka lidar.
Kümzükba maparen atema helicopters aser rong ano tali lemzüktsüogo aser maneni ano sepai tali agutsüsemtsü. Army aser Navy nungi team 42 den helicopter 20 aser rong noklang aika amshia state tesem balala nung kümzükba maparen inyakdar.
Ano külen Coast Guard tesem 28 nung lemzükja kümzükba maparen inyakdar aser tang tashi nung National Disaster Response Force (NDRF)-ia team 39 yoka kümzükba maparen inyakdar. Maneni NDRF team 14 yoksemtsü.
Tang tashi nung NDRF-i nisung 4,000 dak tema kümzükogo aser Navy-i nisung 550 kümzükogo, ta Chief Minister-isa metetdaktsü.
Anogo ishika tejaklen Idukki aser Wayanad district na nung tzümetsüng lendong mejungi liasü, ajisüaka tangbo district ana nungji tzünglu kanga ajema arudar.
Asalentong tasen yanglua inyaktsü atema sorkari ghonda pezü shia tesem balala nungi osang bendendar, aser high-level committee ka anogo shia senden anaben mena tensa azüoktsü merangdar.
State nung district ajakji tzümetsüng agi kongshiba tesemtem, ta sangdongogo aser yimtenren party aikati iba ya linük lendong ka, ta sangdongang ta takhangba agutsüdar.