Kerala nung tzümetsüng süngjemer; tzünglu ajema arutsü

Pathanamthitta (Kerala), Luroi/August 19, 2018: Tanü Kerala kübok Pathanamthitta district nung Army temi tzü metsünga aliba tesemtem nungi tanurtem kümzükba noksa nung angur. 

New Delhi, Luroi/August 19 (Agencies): Kerala nung tzümetsüng tensa tajungba küma tanü Indian Meteorological Department-i district ajak nungi ‘red alerts’ agienogo, ajisüaka district 10 nung orange alerts aser district ana nung yellow alerts sangdongogo.
Amongnü anepdang 10:00 ako nung Idukki reservoir nung tzü level feet 2402.28 liasü aser iba tzü tepdang nung shutters anabo lapokogo. Iba dak alia Periyar ayongi tzü yimokbaji ghonda ka nung cusecs 913 liasü.
Ano külen, Luroi/August 20, 2018 nungi tenzüka Kerala nung tzünglu ajema arutsü, ta ketdangsertemi metetdaktsüogo.
Ajisüaka Kerala kübok tesem aika nung Indian Navy indang Operation Madad maneni agia kümzükba maparen maneni inyakdar.
Tzünglu ajema aruba nung ajemdaker yashi ketdangsertemi district asem nungang red alert sangdonga liasü.
Operation Madad tenzüker anogo 10 nübuba nung diving teams 72 yoka liasü aser team 8 tesem balalai yok.
Kerala Chief Minister, Pinarayi Vijayan-i, “Asürtem ano timba akumtsüa akok. Küptoknü/Honibarnü nisung 33 süogo, aser asür ajak agibo nisung 200 dak tema jungogo,” ta metetdaktsü.
Ano tzümetsüng agi tamajungba kongshiba district asem- Thrissur, Ernakulam aser Pathanamthitta nungbo maneni tayimtsü amshia lendong nung alirtem kümzükdar.
Tang tashi nung ALH, Sea King, Chetak aser MI 17 (IAF indang) tayimtsütem amshia nisung 154 dak tema kümzükogo. Tanüa tayimtsü nungi chiyungtsü den tajemtsü tzü ki aser Tenla ki balala nung merepdakja liasü.
Tanü Health & Family Welfare Union Minister, JP Nadda-i, Centre-i Kerala tensa mita reprangdar aser tzü ajanga menatepba tashidaktem nokdangtsü atema nüngdakba mozütem agutsüdar, ta metetdaktsü.