Kerala nung tzümetsüng ya ‘linük lendong’ ta sangdongtsüla: Congress

New Delhi, Luroi/August 18 (Agencies): Tanü Congress Party-i Centre dang Kerala nung tzümetsüng lendong ya linük lendong, ta sangdongtsüla, ta takhangba agutsü.
Tanü Congress Tir, Rahul Gandhi-i twitter ajanga, “Temeim Ato kilonser, Yimlibilema #Kerala tzümetsüng ya linük lendong, ta memonoi sangdongtsüla. Asen nübur million aika taküm, libaliro aser tarutsü tia lendong nung lir,” ta metetdaktsü.
Luroi/August 12, 2018 nü Union Home Minister, Rajnath Singh-i Kerala nem sen crore 100 agutsütsü sangdonga liasü aser tanü Ato kilonser, Narendra Modi-i state nem sen crore 500 teyari agutsütsü, ta sangdongba sülen Rahul-i Centre nem iba takhangba agutsür.
Ano külen tanga Congress lenirtemia Centre aser tanga state tem dang tzümetsüng agi kongshia aliba Kerala state nem teyari agutsütsü ayongzük.
Osangbener den jembidang Congress lenir, PC Chacko-i, “Nisung meyirjang aika lendong tia nung lir aser nisung belenba rongdak operation tali nüngdaker. Kechisa inyaka arudar, iba atemaji pelar, ajisüaka ano Centre aser tanga state temi taliba yaritsüla, kechiyong Kerala lendong nung lir,” ta ashi.
Ano Congress party otongdar, Randeep Surjewala-i, iba ya linük lendong, ta sangdongra Centre nungi ano teyari taliba angutsü, ta ashi.
Surjewala-i, “Kerala tzümetsüng lendongji koma anga mereprangtet. Iba lendong ya linük lendong, ta sangdongra, ibaji ajanga state-i Centre dang nungi resources taliba angutsü, item resource rongnung kümzükba operation atema defence, rehabilitation mapa atema senotsü aser chiyungtsü densema lir,” ta ashi.