Kerala nung UDF-i kaketshirtem dang Bicycle aser Laptops nangzüker

April 20 (Agencies): Tang Kerala sorkar tashi nung aliba Congress-i aniba UDF-i May 16 atema assembly election manifesto nung ‘Ajak atema chiyungtsü, ajak atema ki aser ajak atema anema alibaren,” sangdongogo.

Iba dak alia parnok indang tongtibangtiba nükjidongji parnok mapatong ‘Development and Care’ kübok aliba küm pongu sentongtem nung maneni terenlok mapa inyakner, ta parnokisa ashi.

Kaket tapak 63 nung aliba manifesto ji Chief Minister, Oommen Chandy-i sayaja liasü.

Iba manifesto nung class 8 nung azünger tetsür shia nem cycle angati aser sorkar school den sorkari yariba school tem nung azünger kaketshir shia nem jenjang dalang agi laptop agütsütsü nangzükogo.

Yi nokdangba dak sentakba nung parnok manifesto nung, state sorkari küm 10 nung mapang telemsa nung yi meshimeshia nokdangtsü, ta shia lir.

UDF-i PPP kübok anema alibaren, benjungbentsü aser medical tourism atema inyaktsü, ta ashi.

Sorkarisa aluyimba tsütsü, talisa rubber lu ayimertem atema inyaktsü aser aluyimertem nem sen tetemlok makai sen aputsütsü, ta manifesto nung nangzüka lir.

Manifesto sayatsüba sülen osangbenertem den jembidang Chandy-i, UDF-i 2011 küm election nung nangzüka aliba ajak inyaktsüogo ta shia maneni yaritsü nüburtem dang mepishir, ta metetdaktsü.

Tanü osangbenertem senden nung chief minister den Kerala PCC Tir, V M Sudheeran, KC-M lenir aser taoba mapang Finance Minister, K M Mani, IUML lenir aser Industry Minister, P K Kunhalikutty nungera liasü.