Kerala nung UDF-i Uniform Civil Code anemer

Thiruvananthapuram (Kerala), July 03 (Agencies): Centre nung BJP-i aniba NDA sorkari linük tesem ajunga nung Uniform Civil Code ka benoktsü atema Law Commission dang reprangshia report ka agütsütsü tuyuba sülen tanü Kerala nung Congress-i aniba UDF Opposition party-i, iba ya ajanga linük nung secular inyakyim yirutsütsü, ta ashi.
Deobarnü Kerala state assembly nung opposition lenir, Ramesh Chennithala-i sangdong ka ajanga, “Iba code ya ajanga linük nung secularism aser linük nüburtem longjema aliba amokmerentsü,” ta ashi.
Paisa, “Law Commission dang report agüjang ta shiogo. Iba mera ya yimtenren nung tajangzük angutsü atema lir, kechiyong Uttar Pradesh assembly election agitsü mapang ana nung lir. Tamangba lokti nung telemsa adokdaktsüba ajanga sangh parivar-i tajangzük angutsü meranger,” ta tai tongloktsü.
UDF nung densema aliba Indian Union Muslim League (IUML)-ia, Uniform Civil Code anema jembiogo.
“July 20 nungi Delhi nung IUML National executive committee senden anogo ananü alidang uniform civil code nung ajemdaker tamangba lokti tilatem indang tebilemtsü onüktem nung o lemteptsü aser longjemer inyaktsü atema telemtetba ka agitsü,” ta IUML secretary, E T Mohammed Basheer-i metetdaktsü.
Yakanü Union Law Minister, Sadananda Gowda-i, Law Commission dang Uniform Civil Code nung report ka agüjang ta shiogo, ta metetdakja liasü.