Kerala nungi lanur 15 tashi samaogo, ISIS nung denner südi ta bilemer

Thiruvananthapuram, July 09 (Agencies): Kerala nung Kasaragod aser Palakkad district na nungi Middle East linüktemi aor lanurtem aika  samaogo aser par kinüngertemi parnokji kiralongrar telok, Islamic State nung denner alitsü südi, ta melung malemer.
State Chief minister, Pinarayi Vijayan-i police dang iba atema bushisüngdangtsü tuyuogo, ta Kasaragod MP, P Karunakaran-i metetdaktsü.
Samaba lanurtem kibongtem nungi apuani kati taoba ita ka tashi par jabaso dang nungi osang kecha mangashir aser parnokji Middle East linüktemi tamangba study atema aoba sülen IS nung densemer südi ta melung malemer.
Kasaragod district panchayat züngsem, V P P Mustafa-i ashiba agi, Eid mapang samar aliba lanur ana tsüraburtem dangi ‘Whatsapp’ osang ajanga, “Onok meyipa marutsü. Yangi Tsüngremer Yimsüsüba lir. Nenoka onok den adentsüla,” ta osang aru.
“Muslim nunger amakba atema US den raratsü asoshi onok IS nung denogo,” ta ano tanga osang ka nung shia lir.
Lanurtem kibongtemi Karunakaran, Thrikarippur MLA M Rajagopalan aser Mustafa na ajuruba sülen tenati Chief Minister nem iba osang metetdaktsü.
Rajagopal-i ashiba agi, samar aliba lanurtem ajakji arishi küm 30 tekübok lir aser parnok ajak tamangba yimsü study atema ao.
TV channels den jembidang samar aliba lanur Hafesuddin tebu, Hakim-i, par jabaso ita ka tejaklen ao aser pa dang nungi osang kecha mali, ta ashi.
“Pa nisung tajung ka ama meyipa arura ni pa pelaa agizüktsü. Yamaji mesüra ni pa tasümanga mereprangner,” ta paisa ashi.
Lanur 15 ji Kasaragod district aser Palakkad district na kübok Padna aser Thrikaripur na nungi lir.