Kerala nungi tangazüktsü

Tang Kerala nung tzümetsüng agi nisungtem timtem  aser takoksa ajuruba ya asenok ajak asoshi yariteptsüba mapang dang masü saka tansütsü mapa ka lir. Tanü tashi nisung 400 jungnüa taküm samaba den alu aser kiojen raksaba tensa tiaji temulung ashitsüka lir. Külen nisung temang mangu mangyima bushiteper, külen kinunger ajak ki toktsür kong jenoktsüar memetet apusor aser külen tzü agi longpanger tzü tajemtsü maka ayatzüra agi tila tanurtem anir jepteper ta asüba tensa mapangji tebang agi ashitsü makokba timtem aser tetsübutsü mapang lir. Iba ama mapang nung akok tashi asenoki yariteptsüla. Aika agi yaribaji dang masü saka  nisung ajaki pei akok terara agi yarira item jagi teyari tuluka akümtsü. Item ama kasa linük nung külem sensosanger timtem lendong tulu ajuruba ngua Center government-i anir state government-temi dena pei akok teyari tenla sen agütsübaji temeim mapa tajung tuluka inyaker asütsü. Aji oda, makayonga Nagaland state government-ia sen crore ka tashi agütsübaji tuluka agütsüogo ta pelaa bilemer. Iba ama mapang nung menua melii arogotemia longjemer tenla sen sarua yoknungbo temeim mapa tuluka inyaker süla. Tzümetsüng ya kodang aremtsüar memetet aser nisungtem asoshibo ano tsümetsüng aremer külenang timtem tuluba amato ajurutsü. Idangjibo, tzümetsüng nung asüba shiruru temang shirepba teshinem aser lishi züknem agi alima asüngtsü aser iba nung jagi ano tashidak aika poktettsü. Ano, shisabolutsü kaji tang Relief Camp 150 shi nung nisung lakh ana dak tali jenoka alirtemji tsümetsüng aremer külena talidak makatsü. Parnok meyong kiojen yanglushitsübaji mapang agitsü aser nisung karbo kiojen ajak tzü agi ponger orr talidak meshimeshia maka shisabolu tulu nung lir. Tzümetsüng aremaka item nisungtem tanaben pei kidang alitsü asoshibo mapang agitsü. Atangji, tzümetsüng lendong ya ajungben lendong aser nisungi soittetla lendong masü kechiyong asenoki tzünglu soittsü makoker. Ajisüaka, tzümetsüng agi asenok lendongi maitsüsa jelia asenoki nokdangtettsü akoker. Tang ama tzümetsüng adokba ya teimbaka iba temeket nung süngdonglidong mali samaba agi tzünglu arudang tzüji sota meyutet tzümetsüng küma ayimer. Ano, tekümdangtsü kaji asenoki akhidang nungi tzü yima aliba lenmangtem nembanga toktsür. Itemji tarutsü atema kangasa mebilemdangi inyakba mapatem lir. Asen lima nunga Dimapur ama nung balaka, minute 5 dang tzünglu maneni arura, kiyong aika motzü agi tao majung mopanga adoker. Talisa nübortem anogo shia oli aruli asüdak lenjem Super market nungbo bus gari dena manentettsüsa khen nung motzü agi dokan pur takdang jara tesadang ka tashibo tzü agi metsüngbanger. Item ajakji asenoki asenoksasa timatemtsüsa inyakba mapatem lir. Alima nung alir asünungji, alima lendong tataloktsübasa, saka asenoki nokdangtetba lendongtema aika lir aser item rongnung tzümetsüng aser menoknok lendongtem ya asütsü. Tzünglu tesashi maneni aruaka asenoki arem tulu wazüka yutetra aser tzü aolen lenmang sademsadema lapoka toktsüra, tzü memetsüngi motzü ajakji tzüimleni lua adoktsü. Iba amaji menoknok anokba mapang nisungtem timtem takoksa ajuruba ya menoknok anokba agi masü saka menoknok anokdang kiojen chirepba agi atalokba lendong teimba lir. Ibaji meteta, menoknok anokyonga mechireptsüsa asenoki kiojen aser lenmang nung aputem yanglura, iba jagi alima lendong aruaka nisungtem peisasa pei taküm kümzüktettsü. Atangji, lendong ya ajungbena dang arur, anungji lendong atalokerbo ajentsü tasak, anungji lendong ataloktsübaji meteta matalokdaktsütsü asoshi nisung shiai pei akok shilem agitsüla. Aiben asenoki alima lendong mataloktsüsa inyaktsübaji government dak imlar, atangji government-i inyaktsüla. Ajisüaka, senso shiai tanü aser asüng atema pei lima tia meteta shilem magira, ashiko government nung alirtemibo pei ajunga asaa dang inyaktsü, idangji nübortembo, tanü Kerala nung ama, mangyim jashi mapang tulu ajurutsü.