Kerala Police-i Bishop Franco dang asüngdangyaogo

Kochi (Kerala), Rongjui/September 19 (Agencies): Kerala nung ‘nun’ ka tashiyim amshia raksatsüba ken o nung tai tonglokja alisang, Jalandhar nung Bishop Franco Mulakkal tanü Tripunithura tonga aruba sülen Kochi Crime Branch office nung Kerala Police-i pa dang asüngdangyaogo.
Bishop Mulakkal den pa indang counsel aser putir kar gari ka nung tanü 10:55 ako meta Crime Branch office tonga aruba sülen Vaikom Deputy Superintendent of Police, K Subhash leniba nung züngsem pongui pa dang asüngdangya.
Anogo ishika tejaklen Missionaries of Jesus Congregation-i Mulakkal-i aibelena mali ta kuli sayutsü atema ken o agutsür ‘nun’ indang noksa ka sayaa liasü.
Tanü pa dang masüdangyadang Inspector General Vijay Sakhre aser Kottayam Superintendent of Police Harishankar nati Kochi nung aliba Inspector General indang office nung Subhash den senden ka mena liasü.
“Bishop apuba nokdangtsü atema court-i tetuyuba aguja mali. Ibaji bushisüngdangba dak keta lir. Tai tonglokja alisangi kuli agutsüba o angadangdar, aser iba ken o nung ibaji kanga tongtibang,” ta police ketdangser kati metetdaktsü.
Nun kati, 2014 aser 2016 küm tsüngda Bishop Mulakkal-i la dak tashiyim mapa 13 ben inyaka lir, ta lai ken o agutsüba nung ajemdaker Bishop anema FIR ka benok.
Yashi Kerala High Court-i pai bail atema mepishibaji Rongjui/September 25 nü angadangtsü ta metetdaktsüogo. Court-isa iba dak sendakba nung affidavit ka renemtsü atema Kerala sorkar dang asüngdangogo.